Soltústik Qazaqstanda vaktsına salatyn pýnktilerdiń sany azaıdy

PETROPAVL. QazAqparat – Soltústik Qazaqstan oblysynda vaktsınatsııa qarqynynyń tómendeýine baılanysty qoǵamdyq orynda ashylǵan ekpe pýnktileriniń birqatary jabylmaq, dep habarlaıdy QazAqparat tilshisi.

SQO densaýlyq saqtaý basqarmasy basshysynyń orynbasary Qumar Kúsemisovtyń aıtýynsha, sońǵy eki aıda koronavırýsqa qarsy vaktsına alýshylardyń sany kúrt tómendegen.

«Shilde aıynda táýligine 3-5 myń adam koronavırýsqa qarsy ekpe alatyn. Qazir vaktsına alýshylardyń sany 600-den aspaıdy. Óńir vaktsınatsııa boıynsha basqalarmen salystyrǵanda sońynda keledi», - deıdi Qumar Kúsemisov.

Ǵ.Músirepov atyndaǵy aýdan, Aıyrtaý, M.Jumabaev, Taıynsha, Qyzyljar jáne Ýálıhanov aýdandary ekpe alýdan kósh sońynda keledi.

«Vaktsına alýshylar sanynyń azaıýyna baılanysty birneshe ekpe pýnktin jabýǵa sheshim qabyldadyq. Olar sońǵy ýaqytta táýligine orta eseppen 4-5 adamdy ǵana qabyldap kelgen. «Taıga» bazaryndaǵy, Áýezov kóshesindegi halyqqa qyzmet kórsetý ortalyǵyndaǵy, sport saraıyndaǵy, kolhoz bazaryndaǵy jáne jastar saraıyndaǵy vaktsınatsııa pýnktteri jabylady. Qalǵandary burynǵysynsha jumystaryn jalǵastyra beredi», - dedi Qumar Kúsemisov.

SQO-da búginge deıin vaktsınanyń birinshi komponentin 230 242 myń adam alsa, 206 566 adam tolyq kýrstan ótti.

Buǵan deıin 15 qyrkúıek óńirde tumaýǵa qarsy vaktsınatsııanyń bastalatynyn aıtqan edik. SQO-ǵa 60 myń doza vaktsına jetkizildi.