Soltústik Qazaqstanda úzdik aýyl ákimi anyqtaldy
«Úzdik aýyl ákimi» baıqaýyn Memlekettik qyzmet isteri agenttigi «Rýhanı jańǵyrý» baǵdarlamasy aıasynda uıymdastyrdy. SQO-da oǵan qatysýǵa 30 aýyl ákimi nıet bildirgenimen, onyń 23-i ǵana baıqaý talabyna saı bolyp shyqty.
«Oblystyń etıka boıynsha senimdi ókilimen birge saýalnama qurastyrylyp, memlekettik qyzmetshilerdiń qanshalyqty ádep saqtaıtyny tekserildi. Ákimderdiń turǵyndarmen baılanys ornatýy, olardyń osy baǵyttaǵy jetistikteri saralandy. «Halyq únine qulaq asatyn memleket» tujyrymdamasy aıasynda halyqtyń ákim týraly pikirin bildik. Ol úshin 16 ólshem boıynsha oblys ákimdiginiń saıtynda onlaın-daýys berý uıymdastyrdyq», - deıdi Memlekettik qyzmet isteri agenttiginiń SQO boıynsha departament basshysy Elena Stepanenko.
Budan basqa baıqaýǵa qatysýshylar «Men nege «Úzdik aýyl ákimi» bolýǵa laıyqpyn» taqyrybynda esse jazyp, aýyldyq okrýgti damytýǵa jáne onyń áleýmettik-ekonomıkalyq máselelerin sheshýge arnalǵan jobalyq jumysyn qorǵady. Joǵary ball jınaǵan úmitkerler aımaqtyq konkýrs komıssııasynyń onlaın áńgimelesýinen ótti. Bul komıssııaǵa BAQ, qoǵamdyq birlestik ókilderi jáne memlekettik organdardyń jetekshileri endi.
«Úzdik ataný úshin Taıynsha aýdanyndaǵy Zelenogaı, Aqqaıyń aýdanyndaǵy Vlasov, Qyzyljar aýdanyndaǵy Roşınskoe, Ǵ.Músirepov aýdanyndaǵy Vozvyshenka jáne Salqynkól aýyldyq okrýgteriniń ákimderi ózara baq synady. Nátıjesinde Zelenogaı aýyldyq okrýginiń ákimi Gúlbarshyn Bátenova jeńimpaz atandy. Onyń essesi de, jobalyq jumysy da joǵary baǵalandy. Turǵyndar arasynda júrgizilgen onlaın-daýys berýde ol 10 balldan 9,88 aldy», - deıdi Elena Stepanenko.
Gúlbarshyn Bátenova sondaı-aq, memlekettik nagrada - «Eren eńbegi úshin» medalimen marapattalǵan. Bul da eskerýsiz qalǵan joq. Endi oblystyń úzdik aýyl ákimi respýblıkalyq baıqaýda oblys namysyn qorǵaıdy.