Soltústik Qazaqstanda soǵystyń 15 ardageri ǵana qaldy

PETROPAVL. QazAqparat – Soltústik Qazaqstan oblysynda Jeńis kúni Ekinshi dúnıejúzi soǵysy ardagerlerimen qatar olarǵa teńestirilgenderge, tyl eńbekkerlerine de syı-qurmet kórsetiledi. Ardagerler turatyn aýlalarda kontserttik baǵdarlamalar uıymdastyrylyp, járdemaqy berilmek, dep habarlaıdy QazAqparat tilshisi.

Uly Jeńistiń 77 jyldyǵyn SQO-da bıyl 15 ardager ǵana qarsy almaq. Onyń ekeýi aýdandarda turady. Qatary sıregen maıdangerlerdiń eń jasy qazir 95-97-de.

«Qarttarymyzdyń 99 %-y ózdiginen júrip-tura almaıdy. Osyǵan baılanysty 9 mamyrda ardagerlermen kezdesý formaty bıyl da ózgeshe ótedi. Buryn, árıne, alańda jınaıtynbyz, ol kezde maıdangerlerimiz jas boldy. Sońǵy eki jyl boıy indetke baılanysty biz qarttarymyzdy úılerine baryp quttyqtap júrdik, olar turatyn úı aýlalarynda, terezeleriniń túbinde kontserttik baǵdarlama uıymdastyrdyq. Bıyl da qalyptasqan osy dástúrdi jalǵastyrmaqpyz. Qazirgi ýaqytta daıyndyq jáne uıymdastyrý jumystary júrgizilip jatyr», - deıdi SQO ardagerler keńesiniń tóraǵasy Eskendir Eleýsizov.

Bıyl da Uly Otan soǵysynyń ár qatysýshysyna 1 mln teńge syıaqy berý týraly sheshim qabyldady.

Soǵysqa qatysy bar basqalar da – UOS ardagerleriniń jesirleri, blokadada jáne kontslagerde bolǵandar umyt qalmaıdy, olarǵa da birretik materıaldyq tólem jasalady.

«7-9 mamyrǵa merekelik baǵdarlama bar. Bıyl sherý bolmaıdy, biraq ardagerlerdiń qurmetine eskertkishterge, Máńgilik alaýǵa gúl shoqtaryn qoıamyz. Petropavlda ǵana 400-den astam tyl eńbekkeri bar. Olardyń da jasy kelgen, 80-nen asqandar. Bıyl olarǵa erekshe kóńil bólinedi. Soǵys kezinde nagrada alǵan tyl eńbekkerlerine 30 myń teńge, qalǵan tyl eńbekkerlerine 15 myń teńgeden járdemaqy beriledi», - deıdi Eskendir Eleýsizov.