Soltústik Qazaqstanda soǵys ardageri 100 jasqa toldy

PETROPAVL. QazAqparat – Soltústik Qazaqstan oblysynyń turǵyny, Uly Otan soǵysynyń ardageri Grıgorıı Krasılnıkov 100 jasqa tolyp, maıdangerdi ǵasyr toıymen polıtseıler quttyqtady, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, maıdanger Grıgorıı Krasılnıkovti 100 jyldyq mereıtoıymen polıtseıler men polıtsııa departamenti ardagerler keńesiniń aqsaqaldary quttyqtady.

Grıgorıı Krasılnıkov 1940 jyly Sverdlov oblysynan ásker qataryna shaqyrylǵan eken. Ol Qıyr Shyǵysta, Habarovsk ólkesinde ornalasqan atqyshtar polkine túsken.

Bul oqý rotasy bolatyn, onda zapastaǵy komandırlerdi daıyndaǵan.

1943 jylǵa deıin sonda qyzmet atqarǵan. Sáýir aıynyń sońynda ásker qataryndaǵylarmen birge Máskeýge kelgen.

Jaıaý ásker qatarynda soǵysqan. Shyǵys Polsha aýmaǵyndaǵy urysta aýyr jaraqattanyp, 1945 jyldyń 9 mamyryn gospıtalde qarsy alǵan.

Qarasha aıynda ǵana úıine oralady. 1948 jyly KSRO ІІM Sverdlovsk mektebine oqýǵa túsedi.

Oqý bitirgen jas mamandy SQO-ǵa jiberedi. Shırek ǵasyr qylmystyq-atqarý júıesinde jedel laýazymdarda qyzmet atqardy.

Ol basqarǵan kolonııa tyń kóterý jyldaryndaǵy qurylystarǵa jumyldyryldy.

Zeınetke 48 jasynda shyqqan, biraq 80 jasqa deıin qyzmetin jalǵastyrǵan: aýdan ortalyǵy Sergeevkada eriktiler jasaǵyn basqaryp, jas qyzmetkerlermen tájirıbesin bólisken.

Tórt bala tárbıelep ósirgen. Ǵasyr jasaǵan ardager li tyń, gazet, kórkem ádebıetti oqıdy, mýzyka tyńdaǵandy jaqsy kóredi.

Polıtsııa departamentiniń bastyǵy Marat Tólebaev pen vedomstvolyq ardagerler keńesi tóraǵasynyń orynbasary Mıhaıl Bednyh maıdangerge myqty densaýlyq pen otbasy amandyǵyn tilep, qurmet kórsetti.

Grıgorıı Ivanovıch óz estelikterimen bólisip, ystyq yqylastaryna alǵys bildirdi.

Búgingi tártip saqshylaryna tynyshtyq, amandyq pen sáttilik tiledi.

Soltústik Qazaqstan oblysynda soǵystan keıingi jyldarda 770 asa maıdanger quqyq qorǵaý organdarynda eńbek etti.

Búgingi tańda olardyń kózi tirisi osy Grıgorıı Krasılnıkov qana.