Soltústik Qazaqstanda radonmen emdeıtin jańa týrıstik nysandar ashylýda

PETROPAVL. QazAqparat - Soltústik Qazaqstan oblysynda týrıstik nysandar sany artyp, burynnan barlary jańartylyp jatyr. Tek byltyr osy maqsatqa 411 mln teńge jumsaldy, dep habarlaıdy QazAqparat tilshisi.

SQO ákimi baspasóz qyzmetiniń habarlaýynsha, óńir basshysy Qumar Aqsaqalov Imantaý-Shalqar kýrort aımaǵynyń týrıstik nysandaryn aralady. Zamanaýı «Izýmrýdnoe» demalys bazasy bir jylda 80 mln teńgege salyndy. Týrıstik nysandy jergilikti kásipker Aleksandr Voronov turǵyzdy.

Qazirdiń ózinde munda 4 úı tolyq daıyn. Úıden birneshe metr qashyqtyqta jaǵajaı ornalasqan. Demalys ornyndaǵy eki qabatty kottedj úıdi jalǵa alý quny - 20 myń teńge.

«Bul demalys orny bir jylda salyndy. Týrısterge bar jaǵdaı jasalǵan. Ystyq jáne aýyz sý, abattandyrylǵan jaǵajaı, balalar alańqaıy bar. Demalys bazalary osyndaı deńgeıde bolýy tıis», - dedi Qumar Aqsaqalov.

Sondaı-aq, óńir basshysy «Shalqar sý» sanatorııin qaıta qalpyna keltirý jumystarymen de tanysty. Jańa ınvestor nysanǵa 1 mlrd teńge qarjy quıǵan. Bul emdeý orny 200 adamdy qabyldaı alady. 50 adam eńbek etedi.

«Sanatorııde radon jáne sazben emdelýge bolady, tuzdy kóldiń jaǵasynda ornalasqan. Bizdiń turǵyndar úshin demalatyn jáne emdeletin jaqsy jer bolady. Kásipodaq joldamalary boıynsha muǵalimder, dárigerler, ardagerler osynda demalmaq», - dedi Qumar Aqsaqalov.

Qazir kýrort aımaǵynda 38 týrıstik nysan bar. Byltyr 411 mln teńgege 10 joba júzege asa bastady. Bıyl 7 demalys bazasy ashylmaq.

Infraqurylymnyń damýyna da kóńil bólinedi. Bıyl joldardy jóndeýge 3 mlrd teńge bólingen. «Vızıt ortalyǵy» salynyp, Imantaý kóliniń jaǵalaýy qalypqa keltiriledi. Botaı mádenıetiniń murajaıy da ashylmaq. Týrıstik soqpaqtar men kempıngtik aımaqtar salynady dep josparlanǵan.