Soltústik Qazaqstanda kúzdik daqyl oraǵy aıaqtalýǵa jaqyn

PETROPAVL. QazAqparat – Soltústik Qazaqstan oblysynda bir aýdan qara bıdaı oraǵyn aıaqtasa, alty aýdanda bul naýqan sońyna jaqyndaǵan, dep habarlaıdy QazAqparat tilshisi.

Bıyl SQO-da 4 mln astam ga-ǵa dándi daqyl egilse, onyń 5 myń gektardan astamy – kúzdik jáne qara bıdaı. Bir apta buryn óńirde egin oraǵy bastalyp, búginde kúzdik daqyldyń 2,4 myń tonnasy jınap alyndy.

«Mamlıýt aýdanynda kúzdik daqyl jınap alyndy. Qazir alty aýdanda oraq júrip jatyr. Aýa raıy múmkindik berse, aptanyń sońyna deıin jınap alady. Qazir dıqandar orta eseppen gektarynan 27,6 tsentnerden ónim alyp jatyr», - deıdi SQO aýyl sharýashylyǵy jáne jer qatynastary basqarmasynyń bas mamany Baqtııar Toqjigitov.

Qazir jıym-terimnen bólek dıqandar egis alqaptaryna mıneraldy tyńaıtqysh seýip, zııankestermen kúres júrgizip jatyr.

«3,5 mln-ǵa jýyq gektardyń aramshóbi joıyldy. Qazir túrli ósimdik aýrýlaryna qarsy dárileý jumysy júrgizilýde. Bıdaıda kóbine «tat», «trıps» aýrýlary kezdesedi, maıly daqyldarǵa «oramjapyraq kóbelegi» zııan keltirýde», - deıdi Baqtııar Toqjigitov.

Búginge deıin oblys alqaptarynda aramshóp pen zııankesterge qarsy 4 myń lıtr preparat qoldanyldy.

Buǵan deıin SQO-da alqaptardy hımııalyq óńdeýge byltyrǵydan 4 mlrd teńgege artyq sýbsıdııa beriletinin aıtqan edik.