Soltústik Qazaqstanda iri qaradan brýtsellez anyqtalǵan aýylǵa shekteý engizildi

ASTANA. QazAqparat – Soltústik Qazaqstan oblysyna qarasty Kamyshlov aýylynda iri qaradan brýtsellez anyqtalyp, atalǵan eldi meken aýmaǵynda shekteý jarııalandy, dep habarlaıdy QazAqparat tilshisi.

«Soltústik Qazaqstan oblysy Aqqaıyń aýdany Toqshyn aýyldyq okrýgi Kamyshlov aýylynda iri qara maldyń brýtsellezi boıynsha shekteý is-sharalaryn engize otyryp, veterınarııalyq rejımi belgilesin», - delingen Ashyq NQA portalynda jarııalanǵan Toqshyn aýyldyq okrýginiń ákimi B. Imantaevtiń sheshiminde.

Málim bolǵandaı, jyl basynan beri iri qaradan alynǵan qan synamalarynyń nátıjesinde 5 bastan brýtsellez anyqtalǵan.

«Bıyl Aqqaıyń aýdany Kamyshlov aýylynda iri qara maldan brýtsellez aýryna júrgizilgen josparly dıagnostıkalyq zertteý nátıjesinde 201 qan synamasynyń beseýi brýtsellezge oń nátıje kórsetti. Osylardy eskere otyryp, SQO, Aqqaıyń aýdany, Toqshyn aýldyq okrýginiń Kamyshlov selosynda iri qara maldyń brýtsellezi boıynsha shekteý is-sharalaryn belgileý týraly sheshim qabyldaý qajet», - dep jazylǵan qujatqa qosymsha berilgen túsindirmede.

Qosa ketsek, jyl bastalǵaly Soltústik Qazaqstan oblysynda 60 shaqty maldan brýtsellez anyqtalyp, olardyń kózi joıylǵan bolatyn.