Soltústik Qazaqstanda eki fermaǵa kún panelderi ornatylady

PETROPAVL. QazAqparat – Soltústik Qazaqstan oblysynda eki sharýashylyq balamaly energııa kózderin engizý boıynsha respýblıkalyq pılottyq jobaǵa qatysyp jatyr. Keıin olardyń fermalary basqa kásipkerler tájirıbe alatyn alańǵa aınalmaq, dep habarlaıdy QazAqparat tilshisi.

SQO Kásipkerler palatasy baspasóz qyzmetiniń málimetinshe, ótken jyldyń kúzinde aýyl sharýashylyǵynda jańartylǵan energııa kózderin qoldaný pılottyq jobasyna qatysý úshin fermerlik sharýashylyqtardan ótinimder qabyldandy. Oǵan 36 suranym túsip, ishinen 10-y iriktelip alyndy.

«Pılottyq jobaǵa Almatydan, Aqtóbe, Shyǵys Qazaqstan jáne bizdiń óńirden qatysyp jatyr. SQO-dan eki sharýashylyq endi. Qazirgi ýaqytta bul fermalarǵa qajetti qondyrǵylar satyp alynyp, jetkizilip jatyr. Olar sharýashylyqtarǵa tegin ornatylady. Al joba aıaqtalysymen, bul fermalar basqa aýyl sharýashylyǵy qurylymdaryna tájirıbe jınaýǵa múmkindik beretin alańǵa aınalmaq», - deıdi «Atameken» UKP jobalar tobynyń sarapshysy Baýyrjan Ahmetaev.

Pılottyq jobaǵa engen sharýashylyqtardyń biri – Taıynsha aýdanynda ornalasqan. «Qaratomar» seriktestigi qoı sharýashylyǵymen aınalysady.

«Qojalyq ıesi buǵan deıin de balamaly energııa kózderimen jumys istegen, tájirıbesi bar. 2019 jyly sharýashylyq shopannyń jyljymaly úıin avtonomdy elektr qýatymen qamtý úshin kún panelderin ornatqan. Mal sanynyń kóbeıýine baılanysty shopanǵa arnalǵan ekinshi úıdi jaraqtandyrý qajettigi týyndap otyr. Kásipker pılottyq jobaǵa qatysýǵa ótinim berdi. Aıtýynsha, qýaty 5 kVt bolatyn, sorǵysy jáne GPS datchıgi bar kún elektr stantsııasy kerek», - deıdi Baýyrjan Ahmetov.

Ekinshisi – Aıyrtaý aýdanynyń turǵyny, jeke kásipker Vera Sýhovanyń shaǵyn qus fermasy. Oǵan kúnnen qýat alatyn elektr stantsııasy, temperatýra datchıgi men energııany paıdalanýdy baqylaıtyn júıe qajet. Óıtkeni, mamannyń aıtýynsha, qusty kútip-baptaý, ınkýbator tıisti rejımde jumys istep, qajetti mıkroklımatty qalyptastyrý úshin elektr qýaty kóp kerek.