Soltústik Qazaqstanda bıyl 140 túlek «Altyn belgige» úmitker

PETROPAVL. QazAqparat – Soltústik Qazaqstan oblysynda bıyl 3,4 myńǵa jýyq túlek bolsa, sonyń 140-y - «Altyn belgige», 203-i - úzdik attestatqa úmitker, dep habarlaıdy QazAqparat tilshisi.

SQO bilim basqarmasynyń basshysy Názir Jáshibekovtyń aıtýynsha, óńirde 74,3 myńǵa jýyq oqýshy bar. Sonyń 3 387-si - 11 synypty, 6 214-i – 9 synypty aıaqtamaq.

Bul eki synyptyń túlekteri 27 mamyr men 10 maýsym aralyǵynda memlekettik emtıhan tapsyrady. Qalǵan synyptar emtıhannan bosatylǵan.

«9 synyp oqýshylary – 4, 11 synyp oqýshylary – 5 emtıhan tapsyrady. 11 synyp túlekteri bıyl alǵash ret Qazaqstan tarıhy pánin bılet alý boıynsha aýyzsha tapsyrady. Eger de oqýshy emtıhan barysynda nashar baǵa alyp qalsa, onda mekteptiń bekitken kúni qaıtalama qorytyndy attestatsııadan ótedi», - deıdi basqarma basshysy.

Bıyl da jazǵy mektepter jumys istemek. Ol 26 mamyr men 17 maýsym aralyǵyn qamtıdy.

Maqsat – oqýshylardyń qıyn taqyryptar boıynsha bilimin tolyqtyrý. Sabaqtar balany jalyqtyrmaıtyn erekshe formatta – oıyn, saıahat túrinde ótpek.

Ulttyq biryńǵaı testileýge qatysýǵa túlekterdiń 74,3 paıyzy – 2 517 túlek tilek bildirgen. Bul byltyrǵydan shamamen 2 paıyzǵa artyq.

«Balalar UBT kúni men ýaqytyn ózderi tańdaı alady. Olardyń synaqtan ótýge eki múmkindigi bolady. Sonyń joǵary kórsetkishimen grant baıqaýyna qatysa alady. Jalpy óńirde UBT ótetin 2 pýnkt bar. Olar Petropavlda jáne Ǵ.Músirepov atyndaǵy aýdannyń ortalyǵy Novoıshımkada ornalasqan. Synaqtar túske deıin jáne tústen keıin ótedi. Bıyl qańtar aıynan bastap UBT tapsyrýshylar júıege kirgende jáne shyqqanda kamera arqyly avtorızatsııadan ótedi. Sondaı-aq pýnkter «1 test tapsyrýshy, 1 kompıýter, 2 kamera» qaǵıdaty boıynsha jumys isteıdi», - deıdi Názir Jáshibekov.

Buǵan deıin SQO bilim basqarmasy sońǵy qońyraý merekesine qatysty birqatar talapty bekitken edi.