Soltústik Qazaqstanda aldaǵy 5 jylda qandaı jańa nysandar iske qosylady

NUR-SULTAN. QazAqparat – Soltústik Qazaqstan oblysyndy damytýǵa arnalǵan keshendi josparda qarajattyń basym bóligi ekonomıka salasyna baǵyttalady. Bul týraly Úkimet otyrysynda SQO ákimi Qumar Aqsaqalov aıtyp berdi, dep habarlaıdy QazAqparat tilshisi.

«Memleket basshysynyń tapsyrmasy boıynsha ákimdik mınıstrliktermen birlesip, 2026 jylǵa deıingi jańa keshendi jospardy jasady. 5 jylda 1,8 trln teńgege 87 is-sharany iske asyrý josparlanǵan. Qarajattyń 70 paıyzy – jeke ınvestıtsııa. Bıýdjettiń 65 paıyzy ekonomıkany odan ári damytýǵa jumsalady», - dedi óńir ákimi.

Onyń aıtýynsha, agroónerkásipte 52 sút fermasy, 6 bordaqylaý alańy, 2 kus fabrıkasy, óńdeý kásiporyndary jáne jylyjaı salynady.

Ónerkásipte taý-ken baıytý kombınattary salynyp, 10 jańa basym joba iske asyrylady.

«Oblysta joldar jóndelip, 98 paıyzy sapaly bolmaq. 2,3 mln sharshy metr baspana salamyz, onyń 500 myńy – áleýmettik toptarǵa. Bıýdjettiń 35 paıyzy densaýlyq saqtaý jáne bilim salalaryna baǵyttalady. Osynyń arqasynda jańa nysandar salynyp, materıaldyq-tehnıkalyq bazasy jańarady», - dedi Q. Aqsaqalov.

Jospardy oryndaý nátıjesinde 2026 jyly aýyl sharýashylyǵy ónimi 400 mlrd teńgege, óńdeý sektory 67 paıyzǵa deıin ósedi.

«Shaǵyn jáne orta bıznes esebinen bıýdjet túsimi 30 paıyzǵa ósip, jalpy óńirlik ónimdegi bıznes úlesi 35,3 paıyzǵa deıin jetpek.

26 myńnan astam jańa jumys orny qurylady. Bul eńbek naryǵynda turaqtylyqty saqtaýǵa jáne azamattardy turaqty jumyspen qamtýǵa múmkindik beredi. Keshendi jospardyń arqasynda jańa óndirister ekonomıkaǵa serpin berip, halyqtyń ál-aýqaty jaqsarady», - dedi ákim.

Aıta keteıik, búgin Úkimet otyrysynda QR Ulttyq ekonomıka mınıstri Áset Erǵalıev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi josparyn tanystyrdy.

Premer-Mınıstr Asqar Mamın keshendi jospary óńirdiń ınfraqurylymyn jaqsartatynyn atap ótti.