Soltústik Qazaqstanda 4,5 myńǵa jýyq adam revaktsınatsııadan ótti

PETROPAVL. QazAqparat – Soltústik Qazaqstan oblysynda densaýlyq saqtaý basqarmasynyń 33 qyzmetkeri revaktsınatsııadan ótti, dep habarlaıdy QazAqparat tilshisi.

SQO densaýlyq saqtaý basqarmasy baspasóz qyzmetiniń málimetinshe, 22 qarashadan bastap óńirde revaktsınalaý júrip jatyr.

Birinshi kezekte koronavırýsqa qarsy vaktsınany úshinshi ret medıtsınalyq qyzmetkerler alyp jatyr.

Oblystyq densaýlyq saqtaý basqarmasynyń qyzmetkerleri de ujym bolyp revaktsınatsııadan ótti.

«Basqarmanyń 33 qyzmetkeri birge baryp vaktsına saldyrdyq. Óıtkeni ujymnyń eńbekke qabilettiligi ár qyzmetkerge baılanysty. Sondyqtan COVID-19-dan saqtaný úshin árqaısymyzdyń ekpe alǵanymyz mańyzdy. Vaktsına saldyryp shyqtyq, jaǵdaıymyz jaqsy. Saldyrǵan kezde, shyqqannan keıin de eshqandaı aýyrsynýdy sezingenimiz joq», - SQO densaýlyq saqtaý basqarmasy basshysynyń orynbasary Qumar Kúsemisov.

Jalpy SQO-da revaktsınatsııa bastalǵaly 4 324 adam ekpe saldyrdy.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, 264 565 adam koronavırýsqa qarsy vaktsınanyń birinshi komponentin alsa, 248 myń adam tolyq kýrstan ótti.

Sondaı-aq Pfizer vaktsınasyn 4 myńǵa jýyq adam saldyrdy, onyń ishinde 3 008 – jasóspirim, 812 – bala emizetin áıel jáne 103 – júkti áıel.