Soltústik Qazaqstanda 2030 adam koronavırýsqa qarsy vaktsına aldy

PETROPAVL. QazAqparat – Soltústik Qazaqstan oblysynda koronavırýsqa qarsy vaktsınalaý naýqany júrip jatyr. Buǵan deıin negizinen medıtsınalyq qyzmetkerler ekpe alsa, qazir olardyń qataryna tártip saqshylary, muǵalimder jáne memlekettik qyzmetshiler qosyldy, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamenti óńirdegi koronavırýs boıynsha ahýalǵa toqtalyp, brıfıng ótkizdi.

Búginde oblysta KVI juqtyrǵandar sany 12 641 adamǵa jetken. Desek te, jaǵdaı turaqtalǵan. Qazir óńirde qaýipti ınfektsııany juqtyrýdyń jańa derekteri táýligine 20-ǵa jetpeıdi.

21 aqpannan bastap SQO «jasyl aımaqta». Osyǵan baılanysty karantındik shekteý sharalary jeńildetilip jatyr.

«Koronavırýspen kúreste vaktsınatsııanyń mańyzy zor. Osy ýaqytqa deıin vaktsınanyń birinshi komponentimen 2030 adam egildi. Olardyń 1580-i medıtsınalyq qyzmetkerler, 193-i pedagogtar, 257-si tártip saqshylary jáne 2-ýi memlekettik qyzmetshi bolsa, 3-ýi basqa sala mamandary. Al vaktsınatsııany 1178 adam tolyq aldy. Olardyń barlyǵy – medıtsınalyq qyzmetkerler», - deıdi SQO sanıtarııalyq-epıdemıologııalyq baqylaý departamenti basshysynyń orynbasary Tatıana Gorlova.