Soltústik Qazaqstan oblysynyń 225 aýylynda ınternet joq

PETROPAVL. QazAqparat – Soltústik Qazaqstan oblysyndaǵy 625 eldimekenniń 543-i jyl sońyna deıin ınternetpen qamtylmaq. Osy maqsatta óńirde eki joba júzege asyrylyp jatyr, dep habarlaıdy QazAqparat tilshisi.

SQO ishki saıasat basqarmasynyń málimetinshe, qazirgi tańda oblys eldimekenderiniń 410-y, ıaǵnı 64.56%-i túrli tehnologııalar boıynsha Internetke qol jetkizdi. Bul aýyldarda 273 myńǵa jýyq adam turyp jatyr.

Al 37 myńnan astam turǵyny bar 225 aýylda áli kúnge ınternet joq. Onyń ishinde 53-i - halyq sany 250-den asatyn úlken eldimekender.

Jospar boıynsha jyl sońyna deıin 133 aýylda ınternet qoljetimdi bolmaq. SQO-da eki joba júzege asyrylyp jatyr. Sonyń biri – Qazaqtelekom, Transtelekommen birlesken memlekettik-jekeshelik áriptestik jobasy. Keńjolaqty ınternet 75 eldimekenge jetti. Qazir Ýálıhanov aýdanynyń Mortyq, Qondybaı jáne Kóbensaı aýyldarynda tıisti jumystar júrip jatyr.

Mobıldi keńjolaqty ınternet Beeline, Kcell, Altel, Tele 2 arqyly 70 aýylǵa qoljetimdi bolmaq. Josparlanǵan jobalar sátti júzege asqan jaǵdaıda qosymsha taǵy 32 eldimekenge ınternet jetedi.

2021 jyly bul jumystar jalǵasyn tappaq. Jeti myńnan artyq turǵyny bar 21 eldimekenge mobıldi keń jolaqty ınternet qosý josparlanǵan. Bul aýyldardyń árqaısysynda 250-den artyq turǵyny bar.

Mamandardyń aıtýynsha, aldaǵy bir-eki jylda oblystyń 95% halqyna keńjolaqty ınternetpen qamtylady. 20 myńǵa jýyq turǵyny bar 172 aýylda bul másele ózekti qalmaq. Olar 2021 jyldyń josparyna engen joq.