Soltústik Qazaqstan oblysynda brýtsellez anyqtalǵan aýylǵa shekteý engiziledi

ASTANA. QazAqparat - Soltústik Qazaqstan oblysyndaǵy Talshyq aýylynda iri qaradan brýtsellez anyqtaldy. Tıisinshe, eldi meken aýmaǵyna shekteý engizilýi múmkin, dep habarlaıdy QazAqparat tilshisi.

«Soltústik Qazaqstan oblysy Aqjar aýdany Talshyq aýyldyq okrýgi Talshyq aýylynyń aýmaǵynda iri qara mal arasynda brýtsellez aýrýynyń paıda bolýyna baılanysty shekteý is-sharalary belgilensin», - delingen Ashyq NQA portalynda jarııalanǵan eldi meken ákiminiń sheshim-jobasynda.

Málim bolǵandaı, shekteýdi engizýge 2 bas iri qara maldan anyqtalǵan brýtsellez aýrýy sebep bolyp otyr.

«1 maýsymda Soltústik Qazaqstan oblystyq veterınarııa bóliminde júrgizilgen dıagnostıkalyq zertteý qorytyndysy boıynsha Aqjar aýdany Talshyq aýyldyq okrýgindegi Talshyq aýylynda 2 bas sıyrdan alynǵan blıologııalyq materıal synamasy brýtsellezge oń nátıje kórsetti. Osyny negizge ala otyryp, aýyl aýmaǵyna shekteý belgileý qajet», - dep túsindirme berilgen sheshimge.

Qujat 21 maýsymǵa deıin kópshilik talqylaýda bolady.

Eske salaıyq, taıaýda Soltústik Qazaqstan oblysyna qarasty Kamyshlov aýylynda iri qaradan brýtsellez anyqtalyp, atalǵan eldi meken aýmaǵynda shekteý jarııalanǵan edi.

Al, jalpy jyl bastalǵaly Soltústik Qazaqstan oblysynda brýtsellez anyqtalǵan 60 shaqty maldyń kózi joıyldy.