Soltústik Qazaqstan oblysynda ahýal baqylaýda – ákim

PETROPAVL. QazAqparat - Soltústik Qazaqstan oblysynda jaǵdaı turaqty jáne tolyǵymen baqylaýǵa alynǵan. Oblys turǵyndary qalypty ómirin jalǵastyrýda, ınternetke qoljetimdilikte irkilis bar. Qoǵamdyq kólik, densaýlyq uıymdary, turmys-tirshilikke qajetti obektiler shtattyq rejımde jumys isteýde. QazAqparat bul týraly oblys ákimdiginiń baspasóz qyzmetine silteme jasap habarlaıdy.

Jýyrda oblys ákimi Qumar Aqsaqalov turǵyndarǵa úndeý jasaǵan bolatyn.

«Elimizde sońǵy kúnderi oryn alǵan jaǵdaı bárimizge úlken syn boldy. Qazir barshamyzǵa memleketimizdi saqtaý mindeti tur. Prezıdent eldegi ahýaldy turaqtandyrý úshin birqatar tapsyrma berip, naqty qadamdar jasady.

Oblysta lańkestik qaýiptiń betin qaıtarý úshin tıisti kúshter men resýrstar jetkilikti. Negizgi memlekettik organdar shtattyq rejımde jumys isteýde. Bizdiń mindet – oblystaǵy mańyzdy nysandardyń jumys isteýin jáne turǵyndardy azyq-túlikpen qamtamasyz etý. Ahýal baqylaýda tur», -dedi óńir basshysy.

Qumar Aqsaqalov soltústikqazaqstandyqtardy arandatýshylyqqa boı aldyrmaýǵa, beıbitshilikti saqtaý úshin tártip saqshylaryna barynsha kómektesýge shaqyrdy. Ákim turǵyndarǵa joǵary azamattyq jaýapkershilik, sabyrlyq pen saıası saýattylyq tanytqany úshin alǵys bildirdi.

5 qańtardan bastap Soltústik Qazaqstan oblysynda Tótenshe jaǵdaı rejımi engizildi. Oblys jáne Petropavl qalasynyń aýmaǵyna 25 blokbeket qoıyldy.