Soltústik Qazaqstan oblysynda 5 kún ishinde 29 mas júrgizýshi ustaldy

PETROPAVL. QazAqparat – Soltústik Qazaqstan oblysynda «Mas júrgizýshi» profılaktıkalyq is-sharasy ótip, bes kún ishinde rýlge spırttik ishimdik iship otyrǵan 29 adam anyqtaldy. Sondaı-aq, 1,5 myń adam jol qozǵalysy erejelerin buzǵan, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, túnde tártip saqshylary «Mitsubishi» kóligin basqarǵan 45 jastaǵy Petropavl turǵynyn toqtatty. Er adam qaladaǵy dámhanalardyń birinde demalǵan, spırttik ishimdik ishken. Biraq, bul oǵan rýlge otyrýǵa kedergi bolmaǵan.

Medıtsınalyq kýálandyrý júrgizýshiniń alkogoldik mas kúıin rastady. QR Ákimshilik quqyq buzýshylyq týraly Kodeksiniń 608-baby boıynsha materıal jınalyp, 15 táýlikke qamaýǵa alyndy. Ol endi kelesi 7 jyl boıy kólikti tek jolaýshy retinde ǵana paıdalana alady.

Al, Qyzyljar aýdany Asanovo aýylynyń mańynda polıtseıler 39 jastaǵy aýyl turǵyny júrgizgen «Mercedes» kóligin toqtatty. Júrgizýshi mas kúıinde ishimdik ishken jolaýshylardy tasymaldaǵan, sonymen qatar onyń kólik júrgizýge quqyǵy bolmaǵan. QR ÁQBtK 608-babynyń 6-bóligine sáıkes, ol 20 táýlikke qamaýǵa alyndy.

«Árbir mundaı sapar qaıǵyly aıaqtalýy múmkin ekenin túsinýi kerek. 5 aı ishinde óńirde mas júrgizýshilerdiń kinásinen 9 jol-kólik oqıǵasy bolyp, 4 adam qaza tapty, 11 adam jaraqat aldy. Mas kúıinde kólik júrgizý faktilerimen kúresý – qozǵalys qaýipsizdigin qamtamasyz etýdiń negizgi mindetteriniń biri», - deıdi jergilikti polıtsııa qyzmeti basqarmasynyń bastyǵy Aıdyn Baımatov.

Jalpy, SQO joldarynda 5 kún ishinde polıtsııa qyzmetkerleri 29 mas júrgizýshini toqtatty. Sondaı-aq, jol qozǵalysy erejelerin buzýdyń 1,5 myńnan astam deregi anyqtaldy.