Soltústik Qazaqstan oblysynda 1,4 trln teńge somasyna 64 ınvestıtsııalyq joba iske asyrylady

NUR-SULTAN. QazAqparat – Búgin Úkimet otyrysynda QR Ulttyq ekonomıka mınıstri Áset Erǵalıev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi josparyn tanystyrdy, dep habarlaıdy QazAqparat tilshisi.

«Mınıstrlik memlekettik organdarmen jáne uıymdarmen birlesip, óńirdiń áleýmettik-ekonomıkalyq damýy men turaqty jumys oryndaryn qurýǵa tikeleı ári janama mýltıplıkatıvtik áserlerdiń joǵary áleýeti bar jobalardy muqııat irikteý boıynsha jumys júrgizdi. Keshendi jospar ınvestıtsııalyq jobalardy iske asyrýdy, turǵyn úı jáne ózge de ınfraqurylymdy, áleýmettik salany damytýdy, sondaı-aq qoǵamdyq quqyqtyq tártipti jáne azamattyq qorǵaýdy qamtamasyz etýdi kózdeıtin 4 baǵyttan jáne 87 is-sharadan turady», - dedi mınıstr.

Onyń aıtýynsha, jospardy iske asyrýdyń jalpy somasy 1,8 trln teńge, onyń ishinde respýblıkalyq bıýdjetten – 517,9 mlrdteńge, jergilikti bıýdjetten – 43,9 mlrd teńge, jeke ınvestıtsııalar – 1,3 trln teńge.

«Jospar aıasynda 1,4 trln teńge somasyna 64 ınvestıtsııalyq jobany iske asyrý josparlanyp otyr. Olar AÓK, ónerkásip, kólik pen logıstıka, týrızm jáne sport, sondaı-aq óńirdiń kásipkerliginiń belsendiligin damytýǵa baǵyttalǵan. AÓK-te 52 sút-taýar fermasy, qurama jem zaýyty, 3 bordaqylaý alańy, 2 qus fabrıkasy, jylyjaı kesheni salynady. Ónerkásipte Arnaıy ekonomıkalyq aımaq aýmaǵynda CLAAS aýyl sharýashylyǵy tehnıkasy óndirisin oqshaýlaý, JOHN DEERE servıs ortalyǵy, «Aqsoran» jáne «Baıan» volfram-molıbden ken oryndaryn ıgerý, sondaı-aq taý-ken metallýrgııa kombınatynyń jáne jańa óndiristik alańdardyń READY-BUILT FACTORY boıynsha kózdeledi», - dedi Á. Erǵalıev.