Soltústik Qazaqstan halqyn para berýge ne ıtermeleıdi - zertteý
Vedomstvo baspasóz qyzmetiniń aqparatyna sensek, «Qazaqstandaǵy jemqorlyqtyń jaǵdaıyna monıtorıng» áleýmettik saýalnamasynyń nátıjesi osylaı deýge tolyq negiz bola alady. Ony «Transparency Kazakhstan» qoǵamdyq qory júrgizedi. Saýalnamaǵa oblys, qala jáne aýdan ortalyqtarynan 700-ge jýyq respondent qatysyp, jaýap bergen. Sondaı-aq, «Ashyq dıalog» portalyna kelip túsken 568 ótinish zerdelengen.
«Qyzyljar – adaldyq alańy» jobalyq keńsesiniń jetekshisi Ekaterına Starostınanyń aıtýynsha, oblys jemqorlyq faktileriniń jıiligi boıynsha ortashadan tómen nátıje kórsetken.
Saýalnama suraqtaryna jaýap bergen Petropavl qalasy men Aqqaıyń aýdany kásipkerleriniń jartysy jemqorlyqtyń asa keń taralmaǵanyn aıtqan. Alaıda olar memlekettik qyzmetterdi alýda sybaılas jemqorlyq shemalaryn paıdalaný sharýany jyldam sheshýge kómektesetinin joqqa shyǵarmaıdy. Jambyl aýdanynan qatysqan respondentterdiń 80 paıyzy da osyndaı pikirde. Al endi qatysýshylardyń 7 paıyzy jemqorlyq kúndelikti tirshiliktiń ajyramas bóligine aınalǵanyn moıyndaǵan.
«Zertteý nátıjesine sensek, respondentterdiń 58 paıyzy memlekettik qyzmetterdi alýda parany halyqtyń ózi usynatynyn aıtqan. Al 23 paıyzy aradaǵy deldaldar ózderi aqsha surap, mazany alatynyn kórsetti. Qalǵan 18 paıyzy jemqorlyqqa sol mekemeniń qyzmetkerleri ıtermeleıdi deıdi», - dep atap ótti E. Starostına.
Saýalnamaǵa jaýap bergenderdiń qaı-qaısysy bolsa da, keıde memorgan qyzmetkerleri máseleni sheshpeı, ádeıilep sozbaqtap júrip alatynyn rastaıdy. Olardyń oıynsha, osy faktor jemqorlyq jaǵdaılaryna alyp keledi. Halyq sharýasyn jyldam jáne qıyndatpaı, ýaqtyly tyndyrý úshin «syılyq» berýge májbúr bolady.
E.Starostına atalmysh saýalnama nátıjesi aldyn ala shara qoldaný úshin memorgandarǵa joldanatynyn da aıtyp ótti.