Soltústik Amerıkada Qazaqstannyń saılaýǵa daıyndyǵy talqylandy

NUR-SULTAN. QazAqparat – Erteń, 10 qańtarda ótetin Májilis depýtattarynyń saılaýy týraly dıplomatııalyq ókildikterdiń brıfıngter serııasyn Qazaqstannyń Soltústik Amerıka elderindegi elshilikteri aıaqtady, dep habarlaıdy QazAqparat QR Syrtqy ister mınıstrliginiń resmı saıtyna silteme jasap.

Qazaqstannyń AQSh-taǵy Elshisi Erjan Qazyhanov Kongress músheleri úshin onlaın formatta brıfıng ótkizdi. Іs-shara qatysýshylaryna Qazaqstandaǵy demokratııalyq ınstıtýttar men onyń barysyn odan ári jetildirýge baǵyttalǵan reformalardyń iske asyrylýy, sondaı-aq saılaý protsesi týraly tolyqqandy aqparat berildi.

Bıylǵy saılaý naýqanyn týraly habardar ete otyryp, dıplomat saılaýǵa daıyndyqtyń negizgi kezeńderi, Qazaqstannyń saılaý zańnamasy, qatysýshy partııalar, Halyqaralyq baıqaýshylar men sheteldik BAQ ókilderin tirkeý týraly egjeı-tegjeıli aıtyp berdi.

Qazirgi pandemııa jaǵdaıynda Elshi E.Qazyhanov memlekettiń saılaý protsesine qatysýshylardyń qaýipsizdigin qamtamasyz etý úshin qabyldap jatqan qosymsha sharalaryn erekshe atap ótti.

QR Elshisi Qazaqstandaǵy demokratııalyq ınstıtýttar men azamattyq qoǵamdy joǵary Halyqaralyq standarttarǵa sáıkes odan ári jetildirý boıynsha sharalar qabyldanǵanyn aıta ketti. Atap aıtqanda, saıası partııalardy tirkeý shegi tómendetilip, áıelder men jastardyń Parlamenttegi ókildigi artty.

«Erkin jáne ádil saılaý elimizdiń Konstıtýtsııasynda bekitilgen Qazaqstannyń memlekettik bıligin uıymdastyrýdyń negizgi qaǵıdaty», - dedi E.Qazyhanov óz sózinde.

Brıfıng qorytyndysy boıynsha E.Qazyhanov zańnamaǵa ózgerister engizý, saıası partııalardyń qyzmeti, memlekettiń turaqty epıdemıologııalyq jaǵdaıdy qoldaý boıynsha qabyldap jatqan sharalary sııaqty suraqtarǵa jaýap berdi.

Qazaqstannyń Kanadadaǵy elshiliginiń onlaın-brıfıngine Kanadanyń ǵylymı jáne qoǵamdyq toptarynyń ókilderi, jýrnalıster, qazaqstandyq stýdentter, Kanadadaǵy QR azamattary, sondaı-aq qazaqstandyq dıasporanyń ókilderi qatysty.

Іs-shara barysynda qatysýshylar Qazaqstandaǵy bıylǵy saılaý protsesiniń erekshelikterimen jáne elimizde jalǵasyp jatqan saıası jańǵyrtý sheńberinde QR Saılaý zańnamasyna engizilgen ózgeristermen tanystyryldy. Bul rette, aǵymdaǵy saılaýdy uıymdastyrý sharttaryna, sondaı-aq saılaýda akkredıttelgen halyqaralyq sheteldik baqylaýshylarǵa erekshe nazar aýdaryldy.

Іs-sharaǵa qatysýshylar Kanadada daýys berýdi uıymdastyrý tártibi máselelerine aıtarlyqtaı qyzyǵýshylyq tanytty. Elshilik 2021 jylǵy 10 qańtarda Ottava men Torontodaǵy №279 saılaý ýchaskesinde QR Parlamenti Májilisiniń saılaýynda daýys berý kúni, ýaqyty jáne tártibi týraly tolyq aqparat berdi. Eldegi qatań karantındik sharalarǵa baılanysty Elshilik qaýipsiz daýys berý protsesin qamtamasyz etý jáne Ontarıo Qoǵamdyq densaýlyq saqtaý departamentiniń barlyq usynymdaryn oryndaý úshin tolyq sharalardy qabyldady.