Solovevtiń shoýyndaǵy shabýylǵa RF bıligi obektıvti jaýap berýi kerek - Muhtar Qul-Muhammed
«Sumyraı Solovev álemniń kóptegen elderinde burynnan non grata alǵan adam bolatyn jáne qazir búkil jerdegi sanktsııalyq qara tizimderde kósh bastap keledi. Sondyqtan yza-kektiń býynan ol eldiń bárine jarmasyp «ýly silekeıin» shashyp júr. Buryn «Rossııa 1» arnasynda ol Almatyǵa bomba «tastap jiberý» týraly da aıtqan bolatyn. Baǵdarlamanyń qonaǵy – Memlekettik Dýmanyń depýtaty Onışenko da odan qatty shoshynyp qalǵan edi», - dedi Muhtar Qul-Muhammed.
Sondaı-aq, ol Solovevtiń barshany jek kórýi kesirinen kóbinese ózeýrep ózi sóılep, baǵdarlamanyń meımandaryn janjal men arandatýǵa ıtermeleıtinin atap ótti. Onyń bári tikeleı efırde jáne esýas keıpinde bolatynyn tilge tıek etti.
«Reseılik saıasattanýshy Drobnıtskııdiń «kelesi másele Qazaqstan bolýy múmkin. Óıtkeni ultshyldyq úrdisteri sol jerde de bastalýy yqtımal» degen sózinen bizdiń elimizge tikeleı qater tóndirý anyq baıqalyp otyr.
Eger ol Eýrazııalyq ekonomıkalyq odaq pen UQShU-da bizben birge turǵan ózimizge dos Reseıdiń memlekettik arnasynyń efırinde kórsetilmese, dúdámal sarapshy-fantast Drobnıtskıı-Jýkovtyń pikirine nazar aýdarmas edik. Reseılik saıasatkerlerdiń osyndaı ekpindi, maqsatty shabýyldary Solovevtiń shoýynda burynnan júıeli túrde jalǵasyp kele jatqandyqtan, olar Reseı Federatsııasynyń federaldy bıligi tarapynan obektıvti jaýapqa laıyq» dep baǵa berdi Halyqaralyq qatynastar, qorǵanys jáne qaýipsizdik komıtetiniń tóraǵasy.
Sóz sońynda Muhtar Qul-Muhammed Qazaqstan 30 jyldan astam ýaqyt boıy táýelsiz memleket ekenin, Solovev pen sol sekildi saıasatkerler shynaıy shyndyqty túsinip, jańa geosaıası aqıqatpen sanasýdy úırenetin ýaqyt kelgenin atap ótti.
Aıta keteıik, joǵaryda aıtylǵan reseılik saıasattanýshy Drobnıtskıı «Kelesi másele Qazaqstan bolýy múmkin. Óıtkeni ultshyldyq úrdisteri sol jerde de bastalýy yqtımal» degen pikiri «Rossııa 1» arnasyndaǵy Solovevtiń shoýynda aıtylǵan bolatyn.