Soqqy jasaıtyn jańa Mı-35M tikushaqtary Qazaqstanǵa jetkizildi
Kópmaqsatty soqqy berýshi Mı-35M tikushaqtarynyń 4 danasy alǵash ret QR Áskerı-áýe kúshteriniń qarý-jaraqtary qataryna qosylyp, elimizdiń ońtústigindegi turaqty mekenine jetkizildi.
Ushqyshtar quramy qaıta oqýdan ótip, avıatsııaǵa ákelingen jańa tehnıkany synap kórýge daıyn. Atalǵan Mı-35M tikushaǵy tamasha ushý-tehnıkalyq sıpattamasyna ıe, joǵary temperatýraly jáne bıik taýly jaǵdaılarda qoldanysqa tıimdi. Bul tikushaq jaı jáne qolaısyz aýa raıynda basqarylatyn jáne basqarylmaıtyn qarý-jaraqty urysta táýlik boıy qoldanýdy qamtamasyz etedi. Sondaı-aq kózdegen maqsatyna kúndiz jerden 10-25 metr bıiktikte ushýdy, al túnde keminde 50 metr bıiktikte ushýdy oryndaı alady. Mı-35M tikushaǵynyń navıgatsııasy men elektrondy ındıkatsııasynyń zamanaýı keshenmen jabdyqtalýy osyndaı tapsyrmalardy oryndaýǵa múmkindik beredi.
Budan ózge, urys mashınasynyń shabýyldan qorǵaný kesheni men qosymsha optsııalary bar. Mı-35M taǵy da bir artyqshylyǵy onyń qurylysynyń jetiktiginde, ıaǵnı tikushaq akýstıkalyq belgilerin tómendetip, urysqa shydamdylyǵyn arttyrady, sondaı-aq tehnıkalyq qyzmet kórsetýdegi qıyndyqtardy tómendete alady.
Negizgi soqqy beretin qyzmetterinen ózge, Mı-35M tikushaǵy jeke quram men júkterdi tasymaldaý, medıtsınalyq qyzmetkerlermen qosa syrqattar men jaralylardy alyp júrý úshin paıdalanylady. Tikushaqtardy jetkizý Qazaqstan men Reseı arasyndaǵy áskerı-tehnıkalyq yntymaqtastyq, sondaı-aq QR Qorǵanys mınıstrligi men Rosoboroneksport kásipornynyń arasyndaǵy shart aıasynda júzege asyrylǵanyn aıta ketken jón.