«Soqqyǵa jyǵylyp, zorlandy»: Talǵarda boıjetken óz-ózine qol jumsamaq boldy

<p>QONAEV. KAZINFORM &ndash; Almaty oblysynyń polıtsııasy Talǵar aýdanynda óz ómirin qımaq bolǵan boıjetkenge qatysty is qozǵady.</p>

Áleýmettik jelide taraǵan aqparatqa sáıkes, jaǵdaı 23 qazan kúni Tuzdybastaý aýyly mańynda bolǵan. Tańǵy ýaqytta jol boıynda turǵan jas qyz kenetten jerge qulap túsken. 

Kýágerdiń sózinshe, qyzdy uryp-soǵyp, zorlaǵan. Osydan keıin boıjetken óz-ózine qol jumsamaq bolǵan.

Osyǵan baılanysty Almaty oblystyq polıtsııa departamenti túsinik berdi.

«Atalǵan derek, Talǵar aýdandyq polıtsııa basqarmasynda tirkeldi. Boıjetken uryp-soǵý jáne zorlaý faktisin joqqa shyǵaryp, aryz jazýdan bas tartty. Alaıda polıtseıler óz-ózine qol jumsaýǵa ıtermeleý deregi boıynsha qylmystyq is qozǵady. Qazirgi ýaqytta oqıǵanyń barlyq mán-jaıyn anyqtaý maqsatynda jedel-izdestirý sharalary kesheni júrgizilip jatyr»,- dep habarlady polıtsııadan.

Osyǵan deıin Talǵarda 4 jigit jasóspirim qyzdy zorlady degen kúdikpen ustalǵany týraly jazǵan edik. 

Budan bólek, Almaty oblysynda zorlaý isi boıynsha aıyptalǵan er adam qamaýdan qashyp ketkeni týraly jazǵan bolatynbyz. 

Keıin Almaty oblysy Polıtsııa departamenti ýaqytsha ustaý ızolıatorynan qashyp ketken 1998 jyly týǵan Talǵar aýdany, Tereńqara aýyly, Novostroıka kóshesi, №216-úı mekenjaıy boıynsha tirkelgen Bekarys Sábıtuly Qalmyrzaevqa izdeý jarııalady.