Semeı ıadrolyq qaýipsizdik aımaǵy quryldy

<p>Búginnen bastap «Semeı ıadrolyq qaýipsizdik aımaǵy týraly» zań kúshine endi. Osylaısha Semeı ıadrolyq qaýipsizdik aımaǵy quryldy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Esterińizge sala keteıik, 2023 jyldyń 5 shildesinde Memleket basshysy «Semeı ıadrolyq qaýipsizdik aımaǵy týraly» jáne «„Qazaqstan Respýblıkasynyń keıbir zańnamalyq aktilerine Semeı ıadrolyq qaýipsizdik aımaǵy, ekologııa jáne elektr energetıkasy máseleleri boıynsha ózgerister men tolyqtyrýlar engizý týraly“ zańdarǵa qol qoıǵan bolatyn.

Atalǵan qujattar búginnen bastap kúshine endi.

Zań normalaryna sáıkes burynǵy Semeı ıadrolyq synaq polıgonynda Semeı ıadrolyq qaýipsizdik aımaǵyn qurý josparlanǵan.

Bul aýmaq ıadrolyq jáne radıatsııalyq qaýipsizdikti qamtamasyz etý, sondaı-aq burynǵy Semeı ıadrolyq synaq polıgonynyń aýmaǵyndaǵy jerlerdi sharýashylyq aınalymǵa birtindep qaıtarý úshin ońaltý maqsatynda qurylady.

Arnaýly aımaqty keshendi ekologııalyq tekserý jáne memlekettik ekologııalyq saraptama nátıjeleri boıynsha anyqtalǵan lastanǵan ýchaskelerde qurý josparlanǵan.

«Semeı ıadrolyq qaýipsizdik aımaǵy týraly» zańda myna máseleler qarastyrylǵan:

— Burynǵy Semeı synaq polıgony jerlerinde jáne normatıvten tys radıoaktıvti lastanýǵa ushyraǵan irgeles aýmaqtarda «Semeı ıadrolyq qaýipsizdik aımaǵy» arnaýly aımaǵyn qurý;
— Radıoaktıvti lastanýdyń taralýyn shekteý;
— Polıgon aýmaǵyndaǵy radıoaktıvti qaldyqtardy jınaý, ornalastyrý jáne kádege jaratý arqyly Semeı ıadrolyq qaýipsizdik aımaǵynyń aýmaǵyn ońaltý;
— Semeı ıadrolyq qaýipsizdik aımaǵyndaǵy radıoaktıvti lastaný deńgeıine úzdiksiz monıtorıng júrgizý.