Soǵysta talaı dıvızııalar bir táýlikte joıylyp ketken- Aıdos Sarym

NUR-SULTAN. QazAqparat – Qazaqstannyń tarıhshylary Ekinshi dúnıejúzilik soǵystyń máselelerin tyńǵylyqty zertteýi kerek. Bul týraly onlaın konferentsııada belgili saıasattanýshy Aıdos Sarym málim etti, dep habarlaıdy QazAqparatt tilshisi.

Búgin Jeńistiń 75 jyldyǵyna oraı «Bilim-Innovatsııa» halyqaralyq qoǵamdyq qory jəne «edLight Education Support Center» JShS-niń uıymdastyrýymen «Urpaqqa uran bolǵan uly erlik» atty respýblıkalyq ǵylymı-praktıkalyq onlaın konferentsııa ótti.

«Biz elimizde óz Táýelsizdigimizge qol jetkizip, óz tarıhymyzdy aıtatyn, jazatyn, zertteıtin zamanǵan keldik. Germanııamen soǵys birshama zerttelgen bolsa, bizdiń qazaqtardyń Keńes-Fın soǵysyna qalaı qatysqany jaıynda tereń zerttelmegen. Sonymen qatar, Japonııada qalaı soǵystyq degen áńgimeler aıtylmaǵan. Soǵys degenimiz - maıdanǵa attanǵan azamattardyń erligi. Kezinde bizge tek jaqsy jaǵyn ǵana kórsetýge tyrysty. Negizi, osy soǵystyń qarapaıym kúnderi bar. Keıbir dıvızııalarymyz tórt adamǵa bir myltyq berip, soǵysqa qatysqan. Talaı dıvızııalar bir táýlikte joıylyp ketken kúnder bar», - dedi saıasattanýshy.

Osy oraıda A. Sarym tarıhty durys zertteý kerektigin atap ótti. Bul turǵyda soǵysta júrgen azamattar kúndelikti ómirin qalaı ótkizgenin tyńǵylyqty zertteý qajet.

«Ekinshi úlken erligimiz – ol tyldaǵy azamattardyń, analarymyzdyń, ájelerimizdiń janqııarlyq eńbegi. Soǵys jaǵdaıynda kúndelikti ómirde shyryldap otyrǵan balaǵa nanyn taýyp berý, odan keıin zaýytqa nemese qyrmanǵa baryp jumys isteý – bul da úlken erlik. Osy jaǵyn da kóp aıta bermeımiz, az-maz kınolarymyz ári shyǵarmalarymyz bar. Bizde soǵys taqyryby tek sony kórgen adamdardyń ǵana ıeligi bolyp qaldy. Biz nege qııaldamaımyz, biz nege oılanbaımyz?», - dedi ol.

Sonymen qatar saıasattanýshy qazir álemde «jadylar soǵysy», «tarıh soǵysy» degen taqyryptar paıda bolǵanyn aıtty. Reseı tarıh taqyrybyna, onyń ishinde Ekinshi dúnıejúzilik soǵys taqyrybyna aıryqsha mán berip otyr.

«Jalpy, bul taqyrypta ózimizdiń jolymyzdy tabýymyz kerek sııaqty. Menińshe, 9 mamyr tek qýanysh kúni emes. Shyndap kelgende, ata-babalarymyzdy eske alyp, meshitke barý kerek. Biz bul kúndeaza tutyp, ıaǵnı ishteı oılanyp, soǵystyń bolmaýyn tileýimiz qajet. Osy oraıda tıisti kózqarasty qalyptastyrǵan durys bolar», - dedi A. Sarym.

Onyń atap ótýinshe, aldaǵy ýaqytta soǵysta, asharshylyqta joǵalǵan adamdardy izdep tabýǵa mán berý kerek. Bul rette arhıvtik jumystardy jandandyrý sharalary kútip tur.

«Biz únemi ózimizdiń jolymyzdy bilip, ózimizdiń ulttyq múddemizdi eshqashan esten shaǵarmaýymyz kerek. Shynymen de soǵysta úlken erlik te, úlken qııanat ta boldy. Ońaı jeńil-jelpi tujyrymdamalarǵa berilmeı, ózimizdiń úlken tujyrymmen kelip, estelikterdi jınaýǵa mán bergen jón», - dedi Aıdos Sarym.