Soǵysta Reseıde qaza tapqan qazaq sarbazynyń súıegi Qazaqstanǵa jetkizildi

PAVLODAR OBLYSY. QazAqparat - Órlitóbe (Pavlodar oblysy) shekaralyq baqylaý-ótkizý pýnktiniń aýmaǵynda ótken resmı is-shara barysynda Qazaqstannyń Omby qalasyndaǵy Bas konsýldyǵynyń qyzmetkerleri qazaq sarbazy Embergen Asaınovtyń súıegin Pavlodar oblysy ákimdiginiń ókilderine tapsyrdy. Bul týraly QazAqparat SІM silteme jasap habarlaıdy.

Jaqyn arada sarbazdyń súıegi Qyzylorda oblysynda turatyn týystaryna jetkizilip, týǵan ólkesinde jerlenedi.

Jaýynger Embergen Asaınov 1900 jyly Kyzylorda oblysynda dúnıege kelgen. 1942 jyldyń aqpan aıynda Aral aýdanynan ásker qataryna shaqyrylyp, Lenıngrad túbindegi keskilesken qandy shaıqasta erlikpen qaza tapqan.

Keńes sarbazynyń súıekterin reseılik izdeýshiler 2019 jyldyń kúzinde Lenıngrad oblysy Kırov aýdynynyń mańynda tapqan. 2021 jylǵy 18 maýsymda Omby qalasynda ornalasqan áskerı dańk murajaı kompleksiniń aýlasynda «Qazaq ulttyq-mádenı ortalyǵy» óńirlik qoǵamdyq birlestigi uıymdastyrǵan saltanatty mıtıng ótti. Atalǵan is-shara barysynda Omby oblysy úkimetiniń resmı ókilderi men jergilikti ardagerler keńesi qazaq sarbazynyń súıegi salynǵan tabyt pen onyń jeke zattaryn Qazaqstannyń Bas konsýldyǵynyń ókilderine áskerı qurmetpen tapsyrdy.

Qazaq sarbazy Embergen Asaınovtyń súıegin taýyp, ony týǵan elge jetkizýge qoldaý kórsetken úshin Bas konsýldyq barlyǵyna óziniń zor alǵysyn bildiredi.