Soǵysta iz-túzsiz ketken SQO jaýyngeriniń súıegi Moldovadan tabyldy

PETROPAVL. QazAqparat – Moldovanyń izdeýshileri Uly Otan soǵysy jyldary maıdan dalasynda qaza tapqan qazaqstandyq jaýynger Ivan Romanovıch Cherednıktiń súıegin tapty. Sarbazdyń nemeresi Petropavlda turady, dep habarlaıdy QazAqparat tilshisi.

Moldovanyń izdeýshileri Pavlodardaǵy «Maıdan joly» izdeý-zertteý otrıadyna habarlasyp, Uly Otan soǵysy jyldary qaza tapqan jaýyngerdiń týystaryn tabýǵa kómek suraǵan.

Bul jaıynda áleýmettik jelide otrıad komandıri Aleksandr Shıtov jazdy.

Aleksandr Shıtovtyń aıtýynsha, Moldovanyń izdeýshileri ıAssko-Kıshınev maıdan dalasynda kezekti qazba jumystaryn júrgizgen.

Bıyl aqpan aıynda Hyncheshtsk aýdany Voıneský eldi mekeniniń mańynda birneshe jaýyngerdiń súıegi tabylǵan.

1944 jyly tamyzda bul jerde úsh gvardııalyq dıvızııanyń bólimsheleri shaıqasqan eken.

Orys tarıhı-patrıottyq klýbynyń jáne «Avgýst» izdeý otrıadynyń músheleri soǵys ýaqytynda jerlengen jaýyngerlerdiń zıratyn taýyp, súıekterin alyp shyqty.

«Birneshe jaýyngerdiń súıegin taptyq. Biraq olarǵa qatysty esh aqparat bolmady. Jaýyngerlerdi shyǵaryp jatqan kezde qaǵazǵa oralǵan zatty taptyq. Keıin durystap qaraý úshin ony alyp qoıdyq. Al sońǵy jaýyngerdi kóterip jatqan kezde gımnasterkanyń qaldyǵy men gvardııalyq belgi kózge tústi. Tabylǵan zattar bul jerde gvardııadyqtardyń soǵysqanyn dáleldeı tústi. Biraq, olarmen jaýyngerlerdiń aty-jónin anyqtaý múmkin emes», - deıdi moldovalyq izdeýshiler.

Olardyń bar úmiti gazetke oralǵan túıinshek boldy. Qabat-qabat oralǵan túıinshekten aldymen taǵy bir gvardııalyq belgi shyqqan.

Keıin «Ozat pýlemetshi» tósbelgisi men nómiri joq «Stalıngradty qorǵaǵany úshin» medali tabyldy. Al sońǵy oramadan «Erligi úshin» kúmis medali shyqty. Onyń syrtynda alty tańbaly nómiri bolǵan.

Arhıvte medaldardyń ıesi anyqtaldy. Ivan Romanovıch Cherednık, áskerı sheni – serjant. Soltústik Qazaqstan oblysy, Peshkovskıı aýdany, Troıtskoe eldi mekeninde týǵan.

Ásker qataryna Presnov áskerı komıssarıatynan shaqyrtylypty. Al týystary degen jerde Fekla Ivanovna Cherednık dep kórsetilgen.

«Ivan Romanovıchtiń nemeresin eki kúnniń ishinde taptyq. Otbasy 1970 jyldary Troıtskoe eldi mekeninen kóship ketken eken. Qazirgi tańda Petropavlda turady. Qazir biz jaýyngerdiń súıegin elge qaıtarý máselesin sheshýimiz qajet. Jaýyngerdiń týǵan-týystaryn izdeýge kómektesken barsha jandarǵa – Jambyl aýdany Troıtskoe eldi mekenniń turǵyndaryna, Jambyl aýdandyq polıtsııa bóliminiń bastyǵy Asan Meıramovqa, jýrnalısterge alǵys aıtamyz», - deıdi Aleksandr Shıtov.