Soǵysqa bastan-aıaq qatysqan ardager keıýana 100 jasqa toldy

ALMATY. QazAqparat - Ekinshi dúnıejúzi soǵysynyń ardageri Nına Afanasevna Krylova búgin júz jasqa toldy, dep habarlaıdy QazAqparat.

Ǵasyr jasaǵan keıýanany quttyqtaýǵa qorǵanys isteri jónindegi basqarmasynyń áskerı qyzmetshileri, Almaty qalasy Túrksib aýdany ákimdiginiń, desanttyq-shabýyldaý áskerleriniń áskerı bóliminiń ókilderi, Aýǵan soǵysynyń ardagerleri men «Jas sarbaz» áskerı-patrıottyq qozǵalysynyń tárbıelenýshileri de keldi.

– Nına Afanasevna – balaýsa shaǵy men jastyǵy Uly Otan soǵysymen tuspa-tus kelgen urpaqtyń ókili. Talaı aýyrtpashylyq men synaqtan ótip, aman qalyp, jeńiske jetken adamdardyń rýhynyń myqtylyǵyna tań qalasyń, - deıdi Túrksib aýdany qorǵanys isteri jónindegi basqarmasynyń bastyǵy polkovnık Samat Toǵanbaev.

Nına Krylova Máskeý oblysynyń ıAzvıtsy aýylynda dúnıege kelgen. Jeti jyldyq mektep pen ındýstrıaldy tehnıkýmdy bitirgennen keıin mamandyǵy boıynsha jumys istegisi keldi.

Alaıda surapyl soǵys onyń josparyn túbegeıli ózgertti. Kóptegen qurdastary sekildi jas qyz el qorǵaýshylarynyń qataryna qosyldy.

Batys maıdanǵa attanǵan qyz 329 zenıttik artıllerııa jáne 8 zenıttik-projektorlyq polk quramyndaǵy áýe shabýylyna qarsy qorǵanys áskerlerinde boldy.

Krylovanyń alǵan mamandyǵy da sırek kezdesetin edi. Jaý ushaqtarynyń dybysyn aldyn ala anyqtaý jumysyna estý qabileti óte joǵary adamdar tartyldy.

Ártúrli kólemdegi qubyrlar júıesiniń kómegimen tyńdaýshy mamandyǵyn meńgergender jaý ushaǵynyń dybysyn qaǵyp alýǵa tyrysyp, keńistikti tyńdady.

Dybysty anyqtaǵan soń obekt jerden jaryqtyń kómegimen belgi berip, oǵan oq jaýdyratyn.

Bir qyzyǵy, tyńdaǵysh mamandar, tipti ushaqtyń túri men ushý bıiktigin de ajyrata alǵan desedi.

Soǵystan keıin Nına Krylova Máskeý pedýchılışesinde tárbıeshi mamandyǵyn oqydy. 1946 jyly kúıeýge shyqty.

Jubaıy qazaqstandyq bolǵan soń olar óz Otanyna keldi. Otbasynda eki bala dúnıege keldi.

Jıyrma jyldan astam ýaqytyn ol mektep jasyna deıingi balalardy tárbıeleýge arnady.

1977 jyly balabaqsha meńgerýshisi qyzmetinen qurmetti demalysqa shyqty.

Qazirgi ýaqytta Nına Afanasevna nemeresiniń qolynda turady.

Búgingi urpaq úshin ardagermen kezdesý óte mańyzdy, óıtkeni Nına Krylova soǵystyń kýágeri ǵana emes, jyl saıyn qatar sırep bara jatqan Uly Otan soǵysynyń kózi tiri ardageri.

Qonaqtar mereıtoı ıesin quttyqtap, onyń jaýyngerlik jolyna jáne jaýmen kúresýge kómektesken sırek kezdesetin mamandyǵyna qyzyǵýshylyq tanytty.

Sondaı-aq jańa ǵasyrǵa qadam basqan adamnyń jan dúnıesiniń myqtylyǵyna tań qaldy.