Soǵys bolyp jatyr dep oıladyq -Arystaǵy jarylysta kindik kesken muǵalimniń áńgimesi
«Arys qalasyna Bilim jáne ǵylym mınıstrliginiń ókili retinde shaqyrylyp, UBT appeltsııasy otyrysyn ótkizip jatqan edik. Komandada 12 adam boldy. Oqytýshylardyń bári de elimizdiń árbir qalasyndaǵy JOO-lardan jınalǵan. 24 maýsym kúni mektep ishinde jumysymyzdy bastap jatqanymyzda bizge «syrtqa shyǵyńyzdar» degen habar keldi. Alǵashynda mán bermegenimizben, qatty daýystan qorqyp syrtqa shyǵýǵa týra keldi. Abdyrap syrtqa shyqsaq, aspan aınalyp jerge túskendeı, aınalanyń bári shýyldap ketken. Soǵys bop jatyr dep oıladyq», - deıdi Balbópe Ótenova Bilim jáne ǵylym mınıstri Ashat Aımaǵambetovtiń marapaty kezinde.
Atyraýdaǵy munaı-gaz ýnıversıtetinde sabaq beretin muǵalimniń aıtýyna qaraǵanda, aýyl muǵalimderi mınıstrliktiń ókilderine jol kórsetip, alys eldimekenge baǵyttap jibergen.
«Jan-jaqqa bólinip kettik. Bir kezde Janat, Shaıza úsheýimiz ǵana qalyppyz. Dál on-aq metr jerge kelip snarıad tústi. Biz qaıda tyǵylarymyzdy bilmeı, úılerden jertóle de suradyq. Sóıtsek, ol úılerdiń otbasylary da qashýǵa qamdanyp jatyr eken. Aqyry, bárimiz bolyp, qyrǵa qaraı júgirdik. Artymyzdan tarsyldaǵan jarqynshaqtar túsip jatyr. Qolyma telefonymdy alyp joldasyma «eki qyzyma ıe bol» degennen basqa eshteńe aıta almadym», - deıdi Balbópe Ótenova.
Arystaǵy apattan jaıaý da, kólikpen de qashqan jurttyń ortasynda qalǵan úsh muǵalimge bir kólik kezdesipti. Іshindegi jas jigit ózin Dosmuhambet degen Arystaǵy UQK qyzmetkerimin dep tanystyryp, muǵalimderdi ala ketken.
«Jolda syıǵansha balalardy da ala kettik. Tórt balasy bar bir kelinshekti jáne ájeıdi otyrǵyzyp aldyq. Álgi áıeldiń eń kishkentaı balasy bir aılyq sábı eken. Bir qyr asqannan keıin benzıni bitip qalǵan bir kólikten aıaǵy aýyr kelinshek túsip jatyr eken. Bárimiz aıaǵy aýyr kelinshekti kóliktiń aldyna akýsherimen birge otyrǵyzyp alyp, jaqyn mańnan aýrýhanaǵa izdedik. Aýrýhanalardyń barlyǵy bos qalǵan eken. Kelinshektiń tolǵaǵy odan saıyn jıileı berdi. Kólik ishinde bosandyryp alamyz dep te oıladyq. Júrgizýshi jigittiń qaısarlyǵy men pysyqtyǵnyń arqasynda Aqjar degen aýylǵa keldik», - deıdi ol.
Shettegi bir úıge toqtaǵan muǵalimder úı ıesimen kelisip, kelinshekti bosandyrýǵa bir bólmeni bóledi.
«Bizdiń baǵymyzǵa qaraı sol úı - meıirimdi Gúlmıra degen apaıdyń otbasy eken. Jaǵdaıymyzdy aıtyp edik, bizge bir bólmeni uıymdastyryp berdi. Tósegimizdi daıyndady. Úsheýimiz de bosandyryp kórmeppiz. Akýsherge kómektestik. Kelinshektiń bosanýyna kómektestik. Náresteniń kindigi moınyna oralyp qalypty, abyroı bolǵanda akýsherdiń biliktiliginiń arqasynda náreste aman-esen dúnıege keldi», - deıdi Balbópe Ótenova.
23 jastaǵy Kenje degen kelinshek osylaısha ekinshi sábıin ómirge ákeldi. Ol 24 maýsym kúni tolǵaǵy bastalyp, Arystyń aýrýhanasyna túsken eken.
«Akýsher ekeýi qashyp-pysyp júgirip birshama shaqyrymdy basyp ótken. Kenje snarıad jarylǵan saıyn jerge otyryp qalyp, qatty qınalypty. Allanyń qalaýymen osylaısha, balanyń kindigin kesip, kindiksheshe atanyp otyrmyn. Ózimniń eki qyzym bar. Ómirge kelgen Kámılá úshinshi qyzym boldy. Amandyǵyn tileımin. Sábıdiń atyn bizdi Aqjar aýylyna alyp kelgen Dosmuhambettiń anasynyń atyna qurmet retinde qoıdyq», - deıdi Balbópe Ótenova.
Kindiksheshe atanǵan Balbópe qazirgi ýaqytta Kenjemen telefon arqyly baılanys habarlasyp turady.
«Kenjeniń de, qyzymyz Kámılániń jaǵdaıy jaqsy. Biz áreketimizdi erlik dep eseptemeımiz. Qudaıǵa shúkir, komandadaǵy 12 adamnyń bári aman-esen Shymkentke jetipti», - dedi ol.
Eske sala ketsek, Bilim jáne ǵylym mınıstri Ashat Aımaǵambetov Arystaǵy jarylys kezinde jas anany bosandyryp alǵan muǵalimderdi marapattady. Shaıza Doskeeva, Balbópe Ótenova, Janat Nurjumanova - mınıstrliktiń atynan dál osy úsh muǵalim Arysta jarylys bolǵan kezde mektepte UBT-nyń apellıatsııa otyrysyn ótkizip jatqan bolatyn.
Bilim jáne ǵylym mınıstri Ashat Aımaǵambetov Arystaǵy jarylys kezinde jas anany bosandyryp alǵan muǵalimderdi marapattady.