Soǵys ardagerleriniń bárine Memleket basshysy atynan syı tapsyrylady

NUR-SULTAN. QazAqparat – Ekinshi dúnıejúzilik soǵys ardagerlerin 9 mamyr kúni Jeńis merekesimen qalaı quttyqtaý josparlanyp otyr? Bul suraqqa OKQ-da ótken baspasóz máslıhatynda QR Eńbek jáne halyqty áleýmettik qorǵaý vıtse-mınıstri Erlan Áýkenov jaýap berdi, dep habarlaıdy QazAqparat tilshisi.

«Jergilikti atqarýshy organdar karantın sharalaryn barynsha qatań saqtap, jumys júrgizedi. 9 mamyr merekesiniń mańyzy zor. Osyǵan baılanysty Memleket basshysynyń atynan soǵys ardagerleriniń bárine merekelik medaldar men quttyqtaý syıy tapsyrylady. Sonymen qatar ardagerlerge azyq-túlik kárzeńkesi de syıǵa beriledi», - dedi Erlan Áýkenov tilshilerdiń suraǵyna bergen jaýabynda.

Aıta ketsek buǵan deıin Erlan Áýkenov Qazaqstanda Ekinshi dúnıejúzilik soǵystyń 1 025 ardageri baryn málim etken edi.

Al Memleket basshysy reseılik «Mır» arnasyna bergen suhbatynda bıyl Ekinshi dúnıejúzilik soǵys ardagerlerine 1 mln teńgeden beriletinin habarlaǵan bolatyn.