Soǵys ardageriniń sanynan 73 jyl buryn tıgen oq alyndy

ASTANA. QazAqparat - Astanalyq dárigerler II Dúnıejúzi soǵysy kezinde jaraqat alǵan ardagerge ota jasap, sanyna 73 jyl buryn kirgen oqty alyp shyqty, dep habarlaıdy QazAqparat tilshisi.  

Qostanaı qalasynyń turǵyny Baltabaı Qazıev Astana qalasynyń №1 aýrýhanasynyń kómegine júgingen. «Qarııa sanym aýyryp júr. Aıaǵymdy basa almaımyn dep aıtty. Sodan biz ony aıaǵyn rengenge túsirdik. Qarasaq, soǵys kezinde tıgen oq qalyp qoıǵan», - deıdi hırýrgııalyq ınfektsııa jáne koloproktologııa bólimshesiniń dárigeri Sáýle Hamzına.
 

Uzyndyǵy 2,5 santımetr bolatyn oq dári qarııanyń sanynda 73 jyl júrgen. Jaryqshaqtyń aınalasyn tot basyp, bulshyq eti irińdeı bastaǵan. Aıta keterligi ardager Qazıev qazir 93 jasta.