Soǵys ardageri Aısara Baımuratova 103 jasqa toldy

TÚRKІSTAN. QazAqparat – Túrkistan oblysy Jetisaı aýdany Jańa aýyl aýyldyq okrýginiń turǵyny Aısara Baımuratova Ekinshi dúnıejúzilik soǵys pen japon soǵysyna kýáger bolǵan, tylda júrip eńbek etken, dep habarlaıdy QazAqparat tilshisi.

1919 jyly dúnıe esigin ashqan Aısara Baımuratova balalar úıinde tárbıelengen. Ekinshi dúnıejúzi jáne Japon soǵystaryna qatysqan.

Jylqymen júrip soldattarǵa sý men tamaq tasyǵan. Bos ýaqytynda tigin tikken. Al soǵystan keıingi jyldary tyń ıgerýge belsene atsalysyp, kanal qazý jumystaryna qatysqan.

Otbasyn quryp, 3 qyz, 2 ul tárbıelep ósirdi, 40-tan astam nemere jáne 70-ke jýyq shóbere súıip otyr. Sondaı-aq 4 shópsheginiń qolynan maı jalaýda.

«Atamyz jubaıyn qatty qyzǵanǵan eken. Sóıtip orden-medaldaryn órtep jibergen. Sodan eshqandaı marapattary qalmaǵan. Men 1983 jyly osy otbasyǵa kelin bolyp tústim. Apamyzdan úırengenim kóp. Tálim-tárbıesin alyp, ósıetin tyńdap óstik. Qazir ósip-óngen úlken áýletke aınalyp otyrmyz», - deıdi kelini Marııam.

Aqjaýlyqty ájeıdiń 2 qyzy jáne 2 kelini «Batyr ana» ataǵyn alǵan.