Soǵysta qaza tapqan jambyldyq maıdangerdiń súıegi 80 jyldan keıin týǵan jerine jetkizildi
Qazaqstandyq jaýyngerdiń súıegin qarsy alý rásimi Taraz qalasy áýeaılaǵynyń áskerı sektorynda barlyq áskerı rásimderdi saqtaı otyryp uıymdastyryldy.
Іs-sharaǵa Jambyl oblysynyń qorǵanys isteri departamentiniń, «Ońtústik» óńirlik qolbasshylyǵy jáne ardagerler uıymdarynyń ókilderi qatysty.
Jambyl oblysynyń týmasy Kádirbek Dáýletqulovtyń súıegin 2023 jyldyń qarasha aıynda Reseıdiń «Áýlıe Ilıa Mýromets zastavasy» izdeý jasaǵy tapqan bolatyn.
Іzdeýshiler súıektiń kimge tıesili ekenin medalondaǵy derekter arqyly anyqtaı alǵan.
— Kádirbek Dáýletqulov týraly kóp áskerı aqparat — qupııa. Óıtkeni ol Keńes Armııasy qatarynda shekarashy qyzmetin atqarǵan, - dep atap ótti Atamnyn Amanaty qoǵamdyq birlestiginiń ókili Ábýbákir Smaıylov. — Onyń 1920 jyly Jambyl oblysynda týǵany, 1943 jyldyń jazynda Kýrsk doǵasyndaǵy qandy shaıqasta qaza tapqany belgili.
Kádirbek Dáýletqulov úılenbegen. Qaza tapqan jaýyngerdiń Jambyl oblysynda turǵan aǵasynyń urpaqtary tabyldy.
Týǵan jeri — Turar Rysqulov aýdanynda jer qoınyna tapsyrý úshin sarbazdyń súıegi týystaryna tapsyryldy.
Sondaı-aq onyń medalony, kaskasy, saper kúregi jáne sarbaz shynyaıaǵy da aǵaıyndaryna berildi.
Jaýyngerdiń súıegin tapsyrý rásimi Jeńis qalalyq saıabaǵynda ornalasqan «Dańq» jaýyngerlik dańq zalynda jalǵasty. Ońtústik óńirdiń áskerı qyzmetshileri men qurmetti qaraýyl rotasynyń sarbazdary sońǵy qurmet kórsetti.
Kádirbek Dáýletqulovtyń týystary is-sharany uıymdastyrýshylarǵa shynaıy alǵysyn jetkizdi.
— Soǵys bastalǵanda Kádirbek aǵamyz nebári 21 jasta eken. Ol tipti shańyraq kóterip te úlgermepti, — dedi jaýyngerdiń nemere qaryndasy Orazkúl Dáýletqulova. — Alaıda biz ol kisi týraly úzdiksiz aqparat izdegen týystarymyzdan biletin edik. Endi, mine, 80 jyldan soń týysqanymyzdyń súıegi týǵan Otanyna oralyp otyr. Biz izdestirý uıymdaryna, sondaı-aq aǵamyzdyń súıegin týǵan jerine jetkizgen áskerı qyzmetshilerge rızamyz.
Atamnyn Amanaty qoǵamdyq birlestigi 2019 jyldan bastap Uly Otan soǵysy jyldarynda qaza tapqan qazaqstandyq jaýyngerlerdi júıeli túrde izdeýmen jáne jerleýmen aınalysyp keledi.
Qoǵamdyq birlestik osy ýaqytqa deıin Qorǵanys mınıstrligimen birlesip 19 sarbazdyń súıegin elimizge jetkizip, qaıta jerledi.