Soǵys jańǵyryǵy: Atyraýǵa maıdanda qaza tapqan jaýyngerdiń súıegi jetkizildi

<p><strong>ATYRAÝ. KAZINFORM &mdash; Atyraý qalasyna Áýe qorǵanysy kúshteriniń arnaıy áskerı-kóliktik ushaǵymen Ekinshi dúnıejúzilik soǵysta qaza tapqan qazaqstandyq jaýynger Qısym Ádıevtiń súıegi jetkizildi.&nbsp;</strong></p>

Saltanatty rásimge Qorǵanys mınıstrliginiń, qalalyq ákimdiktiń, qorǵanys isteri jónindegi departamenttiń ókilderi jáne «Sarmat» mamandandyrylǵan mektep-lıtseı-ınternatynyń oqýshylary qatysty. 

1942 jyly habar-osharsyz ketken Qısym Ádıevtiń súıegin «Fenıks» jasaǵynyń izdeýshileri Smolensk oblysy Temnın aýdany Batıýshkovo aýylynan tapqan bolatyn. Ol jaý oǵynan kóz jumǵan. 

– 1911 jyly týǵan Qısym Ádıevti medalony arqyly anyqtaı alǵan. Bastysy qyzyláskerdiń týystarynyń tez tabylǵany qýantady. Biz qaza tapqan jaýyngerdiń uly Sembaı Qısymovqa ákesiniń «Shagnývshıı v bessmertıe» medalin qosa tabystadyq, - dep atap ótti Atamnyn Amanaty qoǵamdyq birlestigi baspasóz qyzmetiniń basshysy Ábýbákir Smaıylov.

Foto: QR Qorǵanys mınıstrliginiń baspasóz qyzmeti

Qısym Ádıev 80 jylǵa jýyq ýaqyt habar-osharsyz ketkender tiziminde bolǵan. Ol maıdanǵa ketkende artynda áıeli men uly Sembaı qalypty.

– Meniń eki jasymda ákem maıdanǵa ketip, qaıtyp oralmady. Іzdeýshiler men Atamnyn Amanaty qoǵamdyq birlestigine alǵysym sheksiz, - dedi Sembaı Qısymov.

Jaýyngerlik dástúrge sáıkes qyzyláskerdiń súıegi men dýlyǵa, medalon sekildi jeke zattary týystaryna tabys etildi. Endi sarbaz týǵan jerinde áskerı qurmetpen qaıta jerlenedi.