Sochıde 11 qazan kúni TMD Memleket basshylary keńesiniń otyrysy ótedi
11:31, 09 Qazan 2017
ASTANA. QazAqparat - 2017 jyldyń 11 qazanynda Sochı qalasynda (RF) Táýelsiz Memleketter Dostastyǵy Memleket basshylary keńesiniń kezekti otyrysy ótedi. Onda saıası, ekonomıkalyq jáne mádenı-gýmanıtarlyq salalardaǵy jáne Dostastyq qyzmetiniń basqa da negizgi baǵyttaryndaǵy yntymaqtastyqty odan ári damytýǵa baǵyttalǵan birqatar máseleler qarastyrylady, dep habarlaıdy «QazAqparat» HAA tilshisi TMD Atqarý komıtetiniń baspasóz qyzmetine silteme jasap.
Shaǵyn formatta Táýelsiz Memleketter Dostastyǵy aıasynda yntymaqtastyq týraly pikir almasý, sondaı-aq Táýelsiz Memleketter Dostastyǵyna tóraǵalyq etý týraly, TMD Memleket basshylary keńesiniń kezekti otyrysynyń ótkiziletin kúni men orny týraly máselelerdi talqylaý josparlanyp otyr.
Keńestiń keńeıtilgen otyrysynda ekonomıka, mádenı-gýmanıtarlyq salalardaǵy yntymaqtastyqty damytýǵa, qorǵanys saıasaty, syrtqy shekarany qorǵaý, terrorızmge qarsy áreket etý jáne Dostastyqty jańa jaǵdaılarǵa beıimdeýge baǵyttalǵan mańyzdy máseleler talqylanady.