Smolenskiden tabylǵan atyraýlyq jaýyngerdiń súıegi týǵan jerine jetkiziledi
«Pereprava» jasaǵynyń komandıri Natalıa Maksımovanyń aıtýynsha, bıylǵy qazanda Smolensk oblysynyń Kardym aýdanynda izdestirý jumysy kezinde belgisiz jaýyngerdiń súıegi qazaqstandyq tarapqa tapsyrylǵan.
Jaýyngerdiń medalonyndaǵy qaǵazda «Kaz SSR. Gýrevskaıa oblast, g. Gýrev, Baksaıskıı raıon, poselok Saraıchık, polýchıt Erbatyrovoı Rahımoı» degen jazý bar.
«Jaýynger óziniń aty-jónin jazbaǵan. Bul biz úshin jumbaq boldy. Qazaqstandyq izdestirýshilerden belgisiz jaýyngerdiń týystaryn tabýǵa kómek suradyq. 1940 jyldary sol eldi mekende Erbatyrova Rahıma esimdi jalǵyz áıel bolǵany anyqtaldy» deıdi «Pereprava» jasaǵynyń komandıri Natalıa Maksımova.
Natalıa 25 jyldan beri Ekinshi dúnıejúzilik soǵysta habarsyz ketken jaýyngerlerdi izdestirýmen aınalysady. Ózi Qazaqstanda dúnıege kelgen.
Sol sebepten qazaqstandyq jaýyngerlerdiń aty-jónin anyqtap, súıegin týǵan jerine jetkizýdi paryzy sanaıdy.
Jaqynda Smolenk oblysynan deregi tabylǵan belgisiz jaýyngerdiń Saparǵalı Mýkalov ekeni anyqtaldy. Jaýynger 1941 jyly Smolensk shaıqasyna qatysqan.
«Dolg» izdestirý birlestiginiń jetekshisi Nına Kýlıkovskıhtiń aıtýynsha, maıdan dalasynda qazaq jaýyngerleriniń súıegi jıi kezdesedi.
Jaqyn arada Saparǵalı Mýkalovtyń súıegi Atyraý oblysyna jetkizilip, týǵan jerinde áskerı qurmetpen jerlenedi.
Eske sala ketelik, budan buryn Smolensk oblysynda atyraýlyq jaýyngerdiń elge jazǵan haty tabylǵan edi.