Smaıylov monoqalalarda bıznesti damytýdy tapsyrdy
«Bıznes negizinen iri qalalarda shoǵyrlanǵan. Sondyqtan monoqalalar men shaǵyn eldi mekenderde bıznestiń damýyna jaǵdaı jasap, múmkindikterin keńeıtý qajet. Ol úshin «Aýyl amanaty», «Aýyl – el besigi», mono jáne shaǵyn qalalardy damytý, «Qarapaıym zattar ekonomıkasy» jáne «Bıznestiń jol kartasy – 2025» jobalary sheńberinde qoldaý kórsetilip jatyr.
Memlekettik organdar «Atameken» ulttyq palatasymen jáne óńirlermen birlesip, jobalardyń jergilikti jerlerde sapaly iske asyrylýyn qamtamasyz etýi qajet», – dedi ol Úkimet otyrysynda.
Onyń aıtýynsha, shıkizattyq emes salalardyń, onyń ishinde óńdeý ónerkásibiniń áleýetin keńeıtý kerek.
«Jalpy alǵanda, taldaý nátıjeleri bıznestiń shaǵymdary men ótinishteri negizinen jer qatynastary, memlekettik satyp alý, salyqtyq ákimshilendirý, sáýlet jáne qala qurylysy, ınfraqurylymmen qamtamasyz etý salalaryna qatysty ekenin kórsetip otyr.
Memlekettik organdar óńirlermen birlesip, bıznesten túsetin barlyq ótinishti sapaly jáne ýaqytyly qaraýy qajet.
Bilikti mamandardy, ásirese joǵary tehnologııalyq sala mamandaryn sapaly daıarlaýdy qamtamasyz etý kerek.
Oqý-aǵartý, Ǵylym jáne joǵary bilim, Eńbek mınıstrlikteri, «Atameken» palatasy jáne óńir ákimdikteri kadrlardy daıarlaý men oqytý júıesin qazirgi zaman talaptaryna beıimdeý jóninde sharalar qabyldaýy tıis», - dedi Premer-Mınıstr.