Smaıylov EQDB jáne EIB basshylyǵymen jańa ınvestıtsııalyq jobalardy talqylady

ALMATY. QazAqparat – Almatyda ótken «Eýropalyq odaq – Ortalyq Azııa» ekinshi ekonomıkalyq forýmy aıasynda QR Premer-Mınıstri Álıhan Smaıylov Eýropalyq qaıta qurý jáne damý bankiniń (EQDB) prezıdenti Odıl Reno-Basso jáne Eýropalyq ınvestıtsııalyq banktiń (EIB) vıtse-prezıdenti Tereza Chervınskaıamen kezdesý ótkizdi, dep habarlaıdy QazAqparat tilshisi.

EQDB basshysymen kelissóz barysynda QR-daǵy iri ınvestıtsııalyq jobalardy iske asyrý, sonyń ishinde avtojoldardy rekonstrýktsııalaý, káriz-tazartý qurylystary men energetıkalyq qýattardy jańǵyrtý máseleleri talqylandy.

«Qazirgi ýaqytta biz ekonomıkalyq máselelerdiń keń aýqymyn qamtıtyn tyǵyz baılanystar ornattyq jáne ony odan ári damytýdy kózdep otyrmyz. Qazaqstan men EQDB arasyndaǵy yntymaqtastyqty sapaly jańa deńgeıge shyǵarýǵa bolatynyna senimdimin», — dedi Premer-Mınıstr.

Máselen, jaqyn kúnderi EQDB Basqarýshylar keńesiniń jyl saıynǵy otyrysy ótip, onyń sheńberinde Qazaqstanǵa jeke ınvestıtsııalyq sessııa arnaldy.

«Qazaqstan Úkimeti EQDB-men ekijaqty máselelerdiń keń aýqymy boıynsha áriptestikti tereńdetýge daıyn», — dep atap ótti ol.

Óz kezeginde Odıl Reno-Basso EQDB Qazaqstandaǵy jobalarǵa belsendi atsalysyp jatqanyn tilge tıek etti.

«Biz yntymaqtastyǵymyzdy odan ári jalǵastyratynymyzǵa qýanyshtymyz. «Jasyl» energetıkany, jeke sektordy jáne ınfraqurylymdy damytý jobalary bizdiń basymdyq bolyp qala beredi», — dedi Odıl Reno-Basso.

EIB vıtse-prezıdenti Tereza Chervınskaıamen kezdesýde kólik-logıstıka salasyndaǵy jáne agroónerkásiptik keshendegi yntymaqtastyq, atap aıtqanda, ınvestıtsııalyq jáne tehnologııalyq jobalardy júzege asyrý máselesi sóz boldy.

«Eń basym baǵyttardyń biri – «jasyl» ekonomıkany damytýdy yntalandyrý», — dedi Álıhan Smaıylov.

Ol sondaı-aq EIB-ti «jasyl» qarjylandyrý jáne ınnovatsııalarmen almasý turǵysynan Astana halyqaralyq qarjy ortalyǵymen tyǵyz yntymaqtastyq ornatý múmkindigin qarastyrýǵa shaqyrdy.

«Biz bul óńirde uzaq ýaqyt jumys istep kelemiz jáne «jasyl» ekonomıka baǵytyndaǵy yntymaqtastyqty odan ári tereńdetýdi josparlap otyrmyz. Bul «jasyl» energııany óndirý men tasymaldaýǵa, ártúrli nysandar men kólik salasynyń energııa tıimdiligin arttyrýǵa qatysty. Bul tıisti ınfraqurylym qalyptastyrýdy jáne damytýdy qajet etedi. Biz sondaı-aq orta kásiporyndarmen tyǵyz jumys isteýge daıynbyz», — dedi Tereza Chervınskaıa.