«Smart Zholy»-nyń jeńimpazdary anyqtaldy
Bıylǵy irikteýden 20 komanda (Otbasy, Smartremont, Opera Build, Metrobot, Sagrad Forms, Pythonist, Easy Sales, BIM Cost, Q Bit, MobyDev, Foxout, Tastamat, Turaqshare, Botbek, Maintender, Verigram, KPRG, GoCode, We'Q, Biometric) ótken bolatyn. Al aqtyq synda ádil qazylar alqasy úzdik 10 komandany anyqtady. Olar - «Sagrad Forms», «Opera Build», «Turaqshare», «Pythonis»t, «Tastamat», «Verigram», «Biometric», «Otbasy» jáne «Q-Bit», «GoCode». Atalǵan komandalar 23-24 mamyr aralyǵynda Sıngapýrde ótetin Echelon Asia Summit startap-alańynda óz jobalaryn Azııanyń aldyńǵy qatarly venchýrlyq qorlary men korporatsııalaryna tanystyratyn bolady.
Jeńimpazdardy marapattaý rásimine QR Aqparat jáne qoǵamdyq damý mınıstri Dáýren Abaev ta qatysty.
«Smart Zholy» - dúnıejúziniń ozyq memleketterindegi biregeı baǵdarlamalardyń biri. Qazir Qazaqstan Respýblıkasy Tuńǵysh Prezıdenti qorynyń bastamasymen birneshe baǵyt boıynsha startaptar sátti júzege asyrylyp jatyr. Smart Zholy «erteńi ertegideı elorda» degen tirkestiń qalyptasýyna da óz yqpalyn tıgizdi. Eń bastysy, elimizdiń ár aımaǵyndaǵy zerek ári oıly jastarymyz úshin úlken múmkindik berilip otyr. Óıtkeni osy baıqaý Qazaqstan jastarynyń jobalaryn halyqaralyq arenaǵa shyǵarýǵa jol ashady. Bıylǵy Jastar jylynda bizdiń jas daryndarymyz ózderiniń startaptaryn álem naryqtaryna shyǵaryp jatsa, óte jarasymdy bolar edi. Sondyqtan joba fınalısterin shyn júrekten quttyqtaı otyryp, táýelsiz elimizdiń ozyq ıdeıalaryn Sıngapýrda tanystyryp, odan ári álemge tanytýlaryna tilektespin», - dedi D.Abaev.
Aıta keteıik, «Smart Zholy» baǵdarlamasy - Qazaqstan Respýblıkasynyń Tuńǵysh Prezıdenti - Elbasy Qorynyń 2017 jyldan beri iske asyrylyp kele jatqan jobasy. Ol jastarǵa jahandyq naryqqa shyǵýǵa múmkindik beretin biregeı alań. Alǵashqy jyly jobaǵa Nur-Sultan, Almaty, Qaraǵandy jáne Pavlodar qalalarynyń startaperleri ǵana óz jobalaryn usyndy. Al 2018 jyly baǵdarlama 14 oblystyq ortalyqtarymen qatar Nur-Sultan jáne Almaty qalalaryn qamtydy. Jalpy, úsh jylda qatysýshylardan 230 ótinim kelip tústi. 2017-2018 jyldary 18 qazaqstandyq komanda Sıngapýrda ózderiniń jobalaryn halyqaralyq deńgeıde tanystyrýǵa múmkindik aldy.
Bıylǵy saıysqa elimizdiń barlyq qalalarynan jastar qatysty. Ótinim 60-tan astam komandadan, ıaǵnı 250-den astam adamnan kelip tústi. Sebebi ár komandanyń quramynda 2-5 adam bolýy shart. Barlyǵy aǵylshyn tilinde erkin sóıleýi tıis. Osy jolǵy jobalar jasandy ıntellekt, qurylys protsesterdi sıstematızatsııalaý, korporatıvti jáne softverlik sheshimder sııaqty salalardy qamtıdy.