SMART.TV úshin arnaıy «Soyle.kz» qosymshasy ázirlendi

ASTANA. QazAqparat - Búgin Astanada Memlekettik tildi damytý qory men «Samsung Electronics Central Eurasia» kompanııasy birlesip SMART.TV úshin arnaıy ázirlegen «Soyle.kz» qosymshasynyń tusaýkeseri ótti.

Memlekettik tildi damytý qorynyń dırektory Azat Sháýeevtiń sózine qaraǵanda, bul qosymshanyń ázirlenýi qazaq tiliniń álemdik aqparattyq juıege enýine yqpal etpek. Endi «Soyle.kz» qosymshasynyń kómegimen úıde teledıdar aldynda otyryp-aq SMART. TV arqyly qazaq tilin úırenýge bolady.

Esterińizge sala keteıik, «Soyle.kz» portaly qazaq tilin onlaın-rejimde tegin oqytýǵa arnalǵan.

«Portal iske qosylǵannan bergi bir jylda dúnıejúzinen 350 myńnan astam paıdalanýshy qyzmetti qoldanǵan. Arnaıy tirkelip, til úırenip jatqan adamdardyń sany 23 myńnan asty»,-dedi A. Sháýeev.

Sonymen qatar ol bir jylda portal jumysynyń tıimdiligin arttyrý maqsatynda server parametrleri men baǵdarlamalyq júıesin jańartý jáne keńeıtý sharalary iske asyrylǵanyn atap ótti.

Aıta keteıik, Soyle.kz Qazaqstan Respýblıkasy Tuńǵysh Prezıdenti - Elbasy Qory, «Samuryq-Qazyna» AQ jáne «Samsung Electronics» kompanııasynyń qoldaýymen ashylǵan qazaq tilin onlaın rejiminde tegin úıretetin tuńǵysh ınternet portal. Soyle.kz Qazaqstan Respýblıkasynyń Prezıdenti N.Nazarbaevtyń memlekettik tildiń qoǵamdaǵy mártebesin arttyrý, damytý jáne qoldanys aıasyn keńeıtý baǵytyndaǵy talap-mindetterine saı ázirlengen ozyq ІT joba.