Smart Astana qosymshasynda qaýipsizdik boıynsha jańa qyzmetter paıda boldy
Smart Astana - 2015 jyly ashylǵan mobıldi qosymsha.
Onda qala tynysyn nazarda ustaýǵa kómektesetin aqparattar legi, qalalyq qyzmetterdi qoldanýdy jeńildetetin fýnktsııalar jınaqtalǵan.
«Qosymshany paıdalanýshylarǵa shuǵyl qyzmetterden pýsh-habarlamalar kelip otyrady. Mysaly, tótenshe jaǵdaılar departamentiniń aqparaty úzdiksiz jarııalanady. Sondaı-aq avtobýstardyń qozǵalysy, qoǵamdyq kólikter týraly aqparat, aýanyń lastaný deńgeıi, aýa raıyna baılanysty sabaqtyń bolmaıtyny nemese qashyqtan ótetini, qalada ótetin aýqymdy is-sharalar týraly aqparat berilip otyrady. Oǵan qosa, Astana sý arnasyna úıdegi sý kórsetkishterin de onlaın jiberýge bolady. Jobanyń negizgi maqsaty - elorda turǵyndary men qonaqtaryna aqparatty qoljetimdi etý, qalalyq qyzmetter men servısterdiń sapasyn jaqsartýǵa úles qosý», - dedi Smart Astana jobasynyń jetekshisi Aıdyn Espek Astana qalasynyń kommýnıkatsııalar qyzmetinde.
Sonymen birge, Smart Astana qosymshasynda 2023 jyldan bastap Іshki ister mınıstrligimen birlese daıyndalǵan «qaýipsizdik» servısteriniń jańa sanaty iske qosylǵan.
«Máselen, «Esirtkige jol joq» dep atalatyn ótinim jiberý fýnktsııasy Astana qalasynda esirtkiniń taralý orny týraly aqparatty jergilikti organdarǵa jyldam jetkizýge kómektesedi. Taǵy bir jańa fýnktsııa – «tótenshe jaǵdaıdaǵy áreketter algorıtmi» nusqaýlyǵy. Ol qandaı da bir qaýipti jaǵdaı týyndasa, ýaqytyly áreket etýge kómektesedi. «Urlanǵan qurylǵylar bazasynda tekserý» fýnktsııasy da turǵyndar arasynda belsendi paıdalanylýda. Sebebi, qoldanylǵan qurylǵyny alarda osy baza arqyly tekserýge bolady», - dep túsindirdi spıker.
Al «Velosıpedti tirkeý» qyzmeti urlyq syndy jaǵymsyz jaǵdaılardyń aldyn alýǵa kómektesedi.
Ol úshin turǵyndar velosıpedin tehnıkalyq qujaty boıynsha tirkeýi kerek.
Sondaı-aq velosıpedpen júrýge ótinish berý múmkindigi de osy qaýipsizdik servısinde qamtylǵan.
Keıin joǵalǵan jaǵdaıda sol boıynsha habarlasyp, ótinim jiberýge bolady.
«Smart Astana» qosymshasyndaǵy taǵy bir qyzmet – oıyn-saýyq oryndaryndaǵy qaýipsizdik deńgeıi. Bul servıste qaýipsizdik úshin mekeme ıesi qabyldaǵan sharalarǵa baılanysty, oıyn-saýyq ortalyqtarynyń reıtıngi beriledi. Onda órt sóndirý quraldarynyń, beınebaqylaý jáne mamandandyrylǵan kúzet qyzmetiniń, dabyl túımeleriniń bolýy, sondaı-aq mekeme aýmaǵynda jasalǵan qylmystyq jáne ákimshilik quqyqbuzýshylyqtar sany eskeriledi. Azamattardyń «102» arnasyna quqyqtyq tártipti buzǵany úshin shaǵymdanǵan ótinishteri de nazarǵa alynady. Bul reıtıng tek usynys sıpatynda, al maqsaty elorda turǵyndary men qonaqtarynyń qaýipsizdigin qamtamasyz etý», - deıdi Aıdyn Espek.