SІM ókili Germanııada joǵalǵan Qazaqstan azamaty týraly pikir bildirdi
«2024 jylǵy 5 maýsymda Maındaǵy Frankfýrt qalasyndaǵy (Germanııa) Qazaqstannyń bas konsýldyǵyna Qazaqstan azamattarynan 2024 jylǵy 3 maýsymynda qyzy joǵalyp ketýine baılanysty aryz tústi. Bas konsýldyq osy isti ótinish kelip túsken sátten bastap erekshe baqylaýǵa aldy. Aqparat túsken sátten bastap bizdiń dıplomattar jergilikti polıtsııaǵa habarlasyp, polıtsııa óz kezeginde jedel izdestirý is-sharalaryn bastap ketti. Eldiń qoldanystaǵy zańnamasyna sáıkes, qylmystyq istiń mán-jaıy jarııa etilmeıdi jáne oǵan bizdiń tikeleı aralasýǵa quqyǵymyz joq», - dedi resmı ókil.
Aıtýynsha, qazaqstandyq dıplomattar joǵalǵan qyzdyń týystarymen tikeleı baılanysty.
«Qazirgi tańda Germanııanyń syrtqy ister mınıstrligine bul isti erekshe baqylaýǵa alý jáne barlyq qolǵabys kórsetý týraly arnaıy hat joldandy. Jaqyn arada nemis tarapymen birlesip, týystaryna vıza alýǵa jumys júrgizip jatyrmyz», - dedi Aıbek Smadııarov.