SІM Maksım Galkın kontserti jaıly: Halyq kimdi tyńdaıtynyn ózi sheshedi

<p>Syrtqy ister mınıstrligi elimizde reseılik óner ıesi Maksım Galkınniń kontserti ótpeı qalǵanyna pikir bildirdi, dep habarlaıdy QazAqparat tilshisi.&nbsp;</p>

Vedomstvodaǵy brıfıng barysynda BAQ ókilderi Syrtqy ister mınıstrliginiń resmı ókili Aıbek Smadııarovqa osyndaı suraq qoıdy.

Olar Reseı tarapy Qazaqstanda Maksım Galkınniń kontsertin ótkizbeý jóninde hat joldaǵan degen aqparatqa túsinik berýdi suraǵan edi. 

«Men ondaı hat jaıynda alǵash ret estip otyrmyn. Tipti ondaı hat bolǵan kúnniń ózinde kontsert uıymdastyrý mádenıet uıymdarymyzdyń quziretine kiredi. Halyq kimdi tyńdaıtynyn, kimdi tyńdamaıtynyn ózi sheshedi. Men óner, jalpy mádenıet saıasattan tys bolýy tıis dep esepteımin», — dep jaýap berdi Aıbek Smadııarov.

Aıta keteıik, osy qazan aıynda Almaty men Astanada Maksım Galkınniń kontserti ótýge tiıs bolatyn. Alaıda eki kún buryn elordadaǵy «Qazaqstan» kontsert zalynda sý jelilerine jóndeý júrgizilip, búkil kontsertter keıinge qalatyny habarlandy.

Aıaq astynan Almatydaǵy Respýblıka saraıy da 1-15 qazan aralyǵynda jóndeýge jabylatyn boldy. 

Esterińizge sala ketsek, onyń aldynda áleýmettik jelide reseılik telejúrgizýshi, shoýmen Maksım Galkınniń Qazaqstan bıligi óner juldyzynyń Almaty men Astanada kontsert ótkizýine múmkindik bermeı otyrǵanyn aıtqan vıdeosy taraǵan bolatyn.

Astana qalasynyń mádenıet basqarmasynyń túsindirýinshe 8 qazanda Roza Baǵlanova atyndaǵy «Qazaqstan» ortalyq kontsert zalynda Maksım Galkınniń keshin ótkizý jóninde hat kelgen.

Biraq 8 qazanda muǵalimder kúnine arnalǵan kontsert ótkiziletindikten keshti uıymdastyrýshylarǵa basqa kúndi nemese basqa ǵımaratty tańdaý usynylǵan.