Slavıan bazarynda óner kórsetken qazaqstandyq eki ánshi de laýreat atandy

NUR-SULTAN. QazAqparat - Bıyl Vıtebskidegi «Slavıan bazary» halyqaralyq óner festıvalinde Qazaqstan atynan Kyle Ruh (Erik Tólenov), al balalar baıqaýynda Alınýr Hamzın óner kórsetti. Eki oryndaýshy da baıqaýdyń laýreaty atandy, dep habarlaıdy QazAqparat.

Mádenıet jáne sport mınıstrliginiń habarlaýynsha, Erik Tólenov ulttyq dástúrdi saqtaýdaǵy joǵary sheberligi úshin memleketaralyq «MIR» teleradıokompanııasynyń «Pesnıa - Pýt k Sodrýjestvý» arnaıy marapatyna ıe boldy. Sondaı-aq ol halyqaralyq baıqaýdyń laýreaty atandy.

Al 12 jastaǵy Alınýr Hamzın balalar arasynda osy saıysta ekinshi oryn ıelendi.

Aıta keteıik, Erik Tólenov 1993 jyly Túrkistan oblysynyń Aşysaı aýylynda dúnıege kelgen. Kentaý qalasyndaǵy №23 T.Rysqulov atyndaǵy mektepti, T.Júrgenov atyndaǵy Qazaq ulttyq óner akademııasyn bitirgen, 2014-2016 jyldary túrli mýzykalyq toptarda óner kórsetken. 2021 jyly Mozart halyqaralyq shyǵarmashylyq festıvaliniń jáne Welle-music wave halyqaralyq baıqaýynyń gran-prı ıegeri atanǵan, The Voice of Kazakhstan tanymal baıqaýynda ekinshi oryn aldy. Onyń qoıylymy álemniń eń úzdik The Voice shoýlarynyń qataryna endi.

Alınýr Hamzın 2010 jyly Oral qalasynda dúnıege kelgen. №27 mektep-lıtseıiniń 6-synybynda jáne №1 mýzyka mektebinde oqıdy. Sońǵy 5 jylda respýblıkalyq konkýrstarǵa, telejobalarǵa jáne halyqaralyq konkýrstarǵa, onyń ishinde Parıjdegi Junior Eurovision baıqaýyna, Tashkenttegi «Roza vostoka» halyqaralyq konkýrsyna qatysqan. Sondaı-aq, ol ártúrli telejobalar men konkýrstardyń laýreaty.

Foto : gov.kz