Slavıan bazary: Dımash tórelik etken baıqaýdyń alǵashqy kúni qalaı ótti

VITEBSK. QazAqparat - «Slavıan bazary» óner festıvaliniń ajyramas bóligi sanalatyn «Vıtebsk-2021» estradalyq án oryndaýshylardyń halyqaralyq baıqaýynyń birinshi kúni ótti, dep habarlaıdy QazAqparat Dimashnews resýrsyna silteme jasap.

Bıyl álemniń 14 elinen kelgen qatysýshylar «Vıtebsk» jas oryndaýshylar baıqaýynyń Gran-prı ıegeri – «Altyn lıra» músinshesi jáne 20 myń dollar úshin baq synaýda.

Konkýrstyń erejesine sáıkes, oǵan ulttyq konkýrstardyń laýreattary men dıplomanttary atanǵan 18 jastan 31 jasqa deıingi ánshiler qatysa alady.

Ár elden bir ǵana ókil bola alady. Bul joly Qazaqstan namysyn Rýhııa Baıdúkenova qorǵap jatyr.

«Álemdik hıt» dep atalatyn baıqaýdyń alǵashqy kúninde qatysýshylar álemdik dıagrammalarda jetekshi orynǵa ıe bolǵan tanymal týyndyny oryndady.

Árbir ártistiń óner kórsetýi jeke shaǵyn spektakl retinde qabyldandy. Kópshiliktiń súıikti kompozıtsııalary «Todes» shoý-baletiniń horeografııalyq qoıylymdarymen sheber úılesti.

Baıqaýǵa qatysýshylar myńdaǵan kórermen aldynda óz talantyn barynsha ashýǵa jáne shyǵarmashylyq áriptesteriniń aldynda sheberligin kórsetýge tyrysty.

Qatysýshylardyń ónerin kelesi quramdaǵy Anatolıı ıArmolenko (Belarýs) tóraǵalyq etetin halyqaralyq qazylar alqasy baǵalady: Mıshel Poma (Italııa), Konstantın Moskovıch (Moldova), Sergeı Penkın (Reseı), Taısııa Povalıı (Ýkraına), Patrık Jan-Batıst (Frantsııa), Dımash Qudaıbergen (Qazaqstan).

Qazylar oryndaýshylyq sheberlikti 10 baldyq júıe boıynsha ashyq elektrondy daýys berý arqyly baǵalady.

Birinshi baıqaý kúniniń nátıjesi boıynsha eń kóp upaıdy eki qatysýshy aldy.

Qazaqstannyń ókili Rýhııa Baıdúkenova «Emotions» kompozıtsııasymen jáne Serbııadan kelgen qatysýshy Irına Arsenıevıch «I surrender» ánimen 70 baldyń 69 ballyn jınady.

Keshti «Rise like a phoenix» ánimen ashqan Ýkraınadan kelgen qatysýshy Renata Shtıfel 64 upaımen kóshbasshylar úshtigine kirdi.

Dál osy úsh qatysýshy qazylar alqasynyń eń jas múshesi, «Vıtebsk-2015» Gran-prı ıegeri Dımash Qudaıbergennen 10 ball aldy.

Baıqaýdyń ekinshi kúni búgin, 18 shilde kúni keshke ótedi. Onda qatysýshylar slavıan eliniń kompozıtorlarynyń estradalyq ánin slavıan tilinde orkestrdiń súıemeldeýimen oryndaıdy.