Skrınıngtik zertteý: 2,1 myńnan asa adamǵa qaterli isik dıagnozy qoıyldy

<p>ASTANA. KAZINFORM&nbsp;&mdash; Ulttyq onkologııalyq aýrýlardy erte anyqtaý baǵdarlamasynyń sheńberinde júrgizilgen skrınıngtik zertteýler nátıjesi jarııalandy, dep habarlaıdy Densaýlyq saqtaý mınıstrligi.</p>

Onkologııalyq skrınıngterdiń aýqymdy baǵdarlamasy sheńberinde aldyn ala derekter boıynsha halyqtyń nysanaly tobynyń 2,5 mıllıonnan astam adamy zerttelip-qaraldy.

Ulttyq onkologııalyq aýrýlardy erte anyqtaý baǵdarlamasynyń sheńberinde júrgizilgen skrınıngtik zertteýler obyrdy erte dıagnostıkalaý men profılaktıkalaýda joǵary tıimdilikti kórsetedi.

Skrınıng júrgizý kezeńinde mynadaı nátıjeler anyqtaldy:

* 218,8 myń adamda obyrǵa deıingi aýrýlar anyqtaldy.

* 2,1 myńnan astam adamǵa qaterli isik dıagnozy qoıyldy.

Obyrdyń jekelegen túrleri boıynsha skrınıngke erekshe nazar aýdarylady:

Sút bezi obyry

40-70 jastaǵy áıelderdi zerttep-qaraý sheńberinde 830 myńnan astam áıel qamtyldy. 158 myń jaǵdaıda obyrǵa deıingi aýrýlar anyqtaldy. Onyń ishinde 1,5 myń áıelde sút bezi obyry dıagnozy rastaldy.

Jatyr moıny obyry

700 myńnan astam áıel zerttelip-qaraldy. 53 myń jaǵdaıda obyrǵa deıingi aýrýlar anyqtaldy, onyń 359-ynda jatyr moıny obyry rastaldy.

Kolorektaldyq obyr

Skrınıng 50-70 jas aralyǵyndaǵy 900 myńnan astam erler men áıelderdi qamtydy. Obyrǵa deıingi 7826 jaǵdaı anyqtaldy, onyń 356-synda obyr anyqtaldy.

Densaýlyq saqtaý mınıstrliginiń bastamasymen 2025 jyldan bastap barlyq onkoskrınıngter TMKKK paketinde qoljetimdi bolady. Sondaı-aq, 2025 jyldan bastap saqtandyrylýshylar úshin alǵash ret mynalar engiziletin bolady:

— Mı qan aınalymynyń jedel buzylýyn erte dıagnostıkalaý jáne profılaktıkalaý úshin brahıotsefalııalyq tamyrlardyń ýltradybystyq zertteýi;

— júrek tamyrlarynyń zaqymdanýyn erte dıagnostıkalaýǵa jáne mıokard ınfarktisin profılaktıkalaýǵa arnalǵan ambýlatorııalyq koronarografııa.

— Turaqty skrınıngtik zerttep-qaraýlar onkologııalyq aýrýlardy erte anyqtaý múmkindigin aıtarlyqtaı arttyrady, bul emdeýdi erte kezeńderde bastaýǵa múmkindik beredi. Bul óz kezeginde sátti qalpyna keltirý múmkindigin arttyrady jáne asqyný qaýpin azaıtady, — delingen mınıstrlik habarlamasynda.

Aıta keteıik, buǵan deıin Májilis depýtaty Ashat Aımaǵambetov 3,5 mıllıon azamatymyz onkologııany erte anyqtaıtyn skrınıngten óte almaı otyrǵanyn aıtty.