SQO jylý-elektr ortalyǵyndaǵy qulaǵan murjanyń ornyna salynatyn nysannyń irgetasy quıyldy

PETROPAVL. QazAqparat – Soltústik Qazaqstan oblysynyń ákimi Aıdarbek Saparov Petropavldaǵy 2-shi jylý-elektr ortalyǵynda bolyp, mundaǵy jylytý maýsymyna daıyndyq barysyn, jańa murja qurylysyn tekserdi, dep habarlaıdy QazAqparat tilshisi.

«2-shi jylý elektr ortalyǵynda bolyp, jańa murjanyń qurylysy men jóndeý jumystaryn baqyladym. Kelesi jylytý maýsymyna daıyndyq boıynsha jedel keńes ótkizdim. Bıyl kásiporyn murja salýǵa, qazandyqtardy jóndeýge, sondaı-aq elektr jáne jylý jelilerin jańartýǵa 12 mlrd teńge bóldi. Oblys ákiminiń orynbasary, qala ákimi jáne turǵyn úı-kommýnaldyq sharýashylyǵy basqarmasynyń basshysy jumystyń kestege saı júrip jatqanyn árdaıym tekserýi qajet. Bul másele meniń jeke baqylaýymda. Birlesken is-qımyldyń arqasynda jumystardyń der kezinde aıaqtalýyn qamtamasyz ete alamyz», - dep jazdy Aıdarbek Saparov áleýmettik jelidegi paraqshasynda.

Qazirgi ýaqytta ortalyqtaǵy qulaǵan murjanyń ornyna jańasy turǵyzylyp jatyr. Mamyr aıynyń sońynda nysannyń irgetasy quıylyp boldy. Qurylysty júrgizip jatqan mamandardyń aıtýynsha, beton quıylǵannan keıin topyraqpen janasatyn jerlerde gıdrooqshaýlaý jumystary júrgiziledi.

Maýsym aıynyń ortasynda qurǵaǵan jerge jyljymaly qalyp ornatylady, sodan keıin Óskemen qalasy «Qazteplospetsstroı» JShS-niń 80 jumysshysy temirbeton qubyrynyń oqpanyn salýǵa kirisedi.

Jobaǵa sáıkes, tútin murjasy konýs tárizdi bolady, dıametri – tabanynda 20,52 metr, shyńynda 9,2 metr jáne 180 metrge kóteriledi. Jumysty Petropavl qalasynyń «Stroı tsentr Arsenal» JShS merdigerlik uıymy atqaryp jatyr. Ol aıdyń sońyna deıin irgetasyn tolyq daıyndaýy kerek, al maýsym aıynyń basynan bastap «Qazteplospetsstroı» JShS jyljymaly qalyptardy montajdaýdy jáne tútin murjasyn salýdy bastaıdy.

Bıyl temirbeton bóshkesin tolyǵymen salý josparlanǵan, al №1 tútin murjasy tek kelesi jyldyń jazynda iske qosylady.

Esterińizge salaıyq, byltyr 20 naýryz kúni saǵat 19:20-da Petropavldaǵy jylý-elektr ortalyǵynda tútin murjasy jartylaı qulap, 5-shi qazandyq agregatyn toqtatýǵa týra kelgen edi.

Úıindi astynda qalǵan áıeldiń denesi ekinshi kúni ǵana tabyldy.

Arnaıy saraptamadan keıin tútin murjasyn tolyq buzý týraly sheshim qabyldandy.

Keıin Petropavl ákimi №1 tútin murjasynyń qurylysy bastalatynyn aıtty.

Nysan irgetasynyń qurylysy sáýir aıynda bastaldy.