SQO joldarynda 8 qarashadan polıtsııa sany artady

PETROPAVL. QazAqparat – Soltústik Qazaqstan oblysynda polıtseıler jyl basynan jol qozǵalysy erejelerin buzýdyń 52 myńnan astam deregin anyqtady, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, 8 qarashadan elimizdiń ár óńirinde «Qaýipsiz jol» aýqymdy jedel-profılaktıkalyq is-sharasy bastalady. Іs-sharanyń negizgi maqsaty – jol qozǵalysy erejelerin óreskel buzýdyń jolyn kesý jáne anyqtaý. Óńir joldarynda osyǵan oraı dúısenbiden bastap patrýldik polıtsııa jasaqtarynyń sany artady.

Jyl basynan oblysta jol qozǵalysy erejelerin buzýdyń 52 238 deregi anyqtalǵan. Onyń 6519 faktisi jyldamdyqty asyrý, 4761 – jaıaý júrginshilerdiń jol qozǵalysy erejesin buzýy, 2068 – rýlde telefonmen sóılesý, 131 – qozǵalystyń qarsy baǵytyna shyǵý. Kólikti mas kúıde basqarǵany úshin polıtseıler 972 júrgizýshini ustady.

«Qaýipsiz jol» jedel-profılaktıkalyq is-sharasy 8-17 qarasha aralyǵynda ótedi. Maqsaty – jol-kólik oqıǵalaryn azaıtý, kólik tártibin kúsheıtý, sondaı-aq joldardaǵy óreskel zańbuzýshylyqtardy anyqtaý men jolyn kesý. Іs-shara kezeńinde qala syrtyndaǵy avtojoldarda, sondaı-aq qala men eldi mekenderde túngi ýaqytta patrýldik polıtsııa jasaqtarynyń sany arttyrylady. Aýdandarda is-sharaǵa ýchaskelik polıtsııa ınspektorlary tartylatyn bolady», - deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.

Sonymen qatar, maýsymnyń aýysýyna baılanysty, polıtseıler avtokólik ıelerinen jazǵy shınalardy qysqyǵa aýystyrýdy, al jaıaý júrginshilerden jolda eki ese saq bolýdy jáne tártipti saqtaýdy suraıdy.

SQO joldarynda 10 aıda 151 jol-kólik oqıǵasy tirkeldi, saldarynan 28 adam qaıtys bolyp, 206-sy jaraqat alǵan.