SQO jol-kólik apaty eń tómen óńir retinde tirkeldi

ASTANA. QazAqparat - QR Bas prokýratýrasy Quqyqtyq statıtıska jáne arnaıy esepke alý jónindegi komıtetiniń málimetine sáıkes, respýblıka boıynsha 2015 jyldyń 3 aıynda 2014 jyldyń sáıkes kezeńimen salystyrǵanda jol-kólik oqıǵasy 3 paıyzǵa tómendedi.

«Atalǵan merzimde elimizdiń joldarynda 3 686 jol-kólik oqıǵasy bolyp, onda 5 112 adam jaraqat alǵan, al ótken jyldyń 1-toqsanynda 3 872 jol-kólik oqıǵasy tirkelip, onda 5 111 adamnyń densaýlyǵyna zaqym keldi», - delingen komıtet málimetinde.

Barlyq JKO-lardyń ishinde 30 paıyzy Almaty qalasyna tıesili. Alaıda 2015 jyly qalada jol-kólik oqıǵalary azaıyp, 1 163 JKO-ny qurady. Al apattylyǵy az óńir retinde Soltústik Qazaqstan oblysy tirkelip otyr, onda 44 JKO oryn alǵan.

Aqmola obylysynda - 72 (127) , Qostanaı oblysynda - 102 (136) JKO oryn alyp, ótken jylǵa qaraǵanda tómendedi. Astana qalasynda - 159 (121) jáne Jambyl - 241 (220) oblysynda jol-kólik oqıǵasy jasalyp, birshama ósim baıqaldy.

JKO nátıjesinde jaraqat alǵandar sany boıynsha da Almaty qalasy aldynǵy orynda, alaıda mundaǵy kórsetkish ótken jylmen salystyrǵanda tómendegen 1386 (1531). Sondaı-aq, JKO saldarynan Aqmola, Qostanaı, Pavlodar oblystarynda jaraqat alǵan adamdardyń sany azaıyp keledi. Kersinshe, osy jyly Astana qalasynda, Jambyl, Batys Qazaqstan oblystarynda JKO-da jaraqat alǵan adamdar sanynyń sál óskendigi baıqalady.

Statıstıka kórsetip otyrǵandaı, jol apattarynyń sebepteri ózgerissiz qalyp otyr. Burynǵysynsha JKO kóbinese nemese 90 paıyzy Jol qozǵalysy erejelerin óreskel buzatyn júrgizýshilerdiń kinásinen oryn alýda. Máselen, júrgizýshilerdiń kinásinen 3 468 jol apaty bolǵan, onyń ishinde 93 júrgizýshi alkogoldik nemese esirtkilik masaıǵan kúıinde bolǵan.