SQO Jer komıssııasynyń múshesi jerdi satýǵa tyıym salatyn zań jobasyna qatysty pikir aıtty

NUR-SULTAN. QazAqparat - «Mambetov jáne K» senim seriktestiginiń dırektory, SQO Jer komıssııasynyń múshesi Erkebulan Mambetov Parlament Májilisine joldanǵan jerdi sheteldikterge satýǵa birjola tyıym salýdy kózdeıtin zań jobasyna qatysty pikir bildirdi, dep habarlaıdy QazAqparat tilshisi.

«Bul – durys sheshim dep sanaımyn. Óz ýaqytynda bul másele kóp talqylanǵan. Osy joly egjeı-tegjeıli, jan-jaqty qaraldy dep oılaımyn», - deıdi Erkebulan Mambetov.

Buǵan deıin «Aýyl» halyqtyq-demokratııalyq patrıottyq partııasy tóraǵasynyń birinshi orynbasary Tóleýtaı Rahymbekov te jerdi sheteldikterge satýǵa tyıym salatyn zań jobasyna qatysty pikir bildirgen.

«Aýyl» halyqtyq-demokratııalyq patrıottyq partııasy óziniń saılaýaldy baǵdarlamasynda sheteldik azamattarǵa, azamattyǵy joq azamattarǵa, sondaı-aq sheteldik azamattyń kez kelgen qatysy bar zańdy tulǵalaryna jerdi satý men jalǵa berýdi múldem qoldamaıtynyn málimdedi. Nelikten? Birinshiden, jer – ata-babalarymyzdan qalǵan amanat. Ekinshiden, qazaqtar eshqashan jerge jeke menshik quqyǵymen ıe bolǵan emes. Keıbireýler Amerıka, Kanada men Eýropany mysalǵa keltirip, jerdi jeke menshikke ótkizýge yntalandyrady. Bul jerde tym bolmaǵanda halyqtyń mentalıtetin eskerýimiz kerek. Bul memleketterde neni bolsyn ózine menshiktep alý mentalıteti bar, al qazaq halqy úshin jer – ortaq qundylyq», - degen bolatyn Tóleýtaı Rahymbekov.

Eske sala ketsek, buǵan deıin Memleket basshysy Qasym-Jomart Toqaev Jerdi sheteldikterge satýǵa birjola tyıym salýdy kózdeıtin zań jobasyn Májiliske joldaǵany týraly jazǵan bolatynbyz.