SQO úsh turǵyny alaıaqtarǵa aldanyp, 9 mln teńgesinen aıyryldy

PETROPAVL. QazAqparat – Soltústik Qazaqstan oblysynda ótken demalys kúnderi 3 turǵyn alaıaqtardyń «toryna» túsip, 9 mln teńgeni aýdaryp jibergen, dep habarlaıdy QazAqparat tilshisi.

SQO prokýratýrasy turǵyndardy alaıaqtardyń «sizdiń týysyńyz apatqa ushyrady» shemasyn jıi qoldanatyny týraly eskertedi.

Bul tásil negizinen egde jastaǵy adamdardy aldaýǵa baǵyttalǵan, «bankterden qońyraýlar» sııaqty munda da alaıaqtar top bolyp áreket etedi.

Vedomstvonyń málimetinshe, ótken demalys kúnderi óńirdiń úsh turǵyny osyndaı shemamen 9 mln teńgege aldanyp qalǵan.

Petropavldyń 67 jastaǵy turǵynyna belgisiz áıel qońyraý shalyp, ózin polıtsııa qyzmetkeri retinde tanystyrǵan jáne qyzynyń kinásinen jol-kólik oqıǵasy bolyp, adam zardap shekkenin habarlaǵan.

Sodan keıin «jalǵan polıtseı» bul máseleni sheship, jyly jaýyp qoıý úshin jábirlenýshige 5 mln teńge tóleý qajettigin aıtqan.

Tutqanyń ar jaǵyndaǵy beıtanysqa sengen qala turǵyny 3 mln teńge somany aýdarǵan.

Tek keıin ol qyzymen habarlasyp, bári jaqsy ekendigin jáne onyń eshqandaı jol-kólik oqıǵasyna túspegenin biledi.

«Eger belgisiz adam qońyraý shalyp, ózin quqyq qorǵaý organdarynyń qyzmetkeri retinde tanystyrsa jáne sizdiń týysyńyz qıyndyqqa tap bolǵanyn habarlasa qandaı da bir áreket jasamas buryn, telefondy qoıyp, ózińizdiń týysyńyzben baılanysýǵa tyrysyńyz. «102» nemese «49-39-49» telefon nómirine qońyraý shalyńyz. Tanys emes adamdardan túsken qońyraýlarǵa senbeńiz. Alaıaqtarǵa aqsha men parolderdi bermeńiz. Aqparatty tekserińiz. Resmı uıymdarǵa qońyraý shalyńyz jáne mundaı qyzmetkerlerdiń shynymen jumys isteıtinin tekserińiz», - deıdi prokýratýra ókilderi.

Jyl basynan beri quqyq qorǵaý organdaryna alaıaqtyq týraly aryzben 315 adam júginip, 672 mln teńgege aldanǵan.